Ռուսաստանն Ուկրաինայի վերաբերյալ բանաձևի նախագիծ է ներկայացրել ՄԱԿ-ի Անվտանգության խորհուրդ

Ռուսաստանը բանաձևի նախագիծ է ներկայացրել ՄԱԿ-ի Անվտանգության խորհուրդ, որը նպատակամղված է Ուկրաինայում բռնության անհապաղ դադարեցմանը և հումանիտար միջանցքների ստեղծմանը: Այդ մասին լրագրողներին հայտնել է համաշխարհային կազմակերպությանն առընթեր ՌԴ-ի մշտական ներկայացուցիչ Վիտալի Չուրկինը:

«Մենք Ուկրաինայի իրադրության վերաբերյալ բանաձևի նախագիծ ենք ներկայացրել Անվտանգության խորհուրդ»,- ասել է նա ԱԱԽ-ում փակ խորհրդակցության ավարտից հետո: Չուրկինի խոսքով` ՌԴ-ի կողմից ներկայացված փաստաթուղթը «քաղաքականացված չէ»: «Այն պահանջում է բռնության անհապաղ դադարեցում, հումանիտար միջանցքների ստեղծում, որոնք թույլ կտան բնակչությանը անվտանգ հեռանալ մարտերի ասպարեզի վերածված շրջաններից»,- բացատրել է դիվանագետը:

Մինչդեռ ՄԱԿ-ին առընթեր Մեծ Բրիտանիայի մշտական ներկայացուցիչ Մարկ Լայալ Գրանտը կարծիք է հայտնել, որ հումանիտար ասպեկտների վրա հիմնված փաստաթուղթը «չի կարող ադեկվատ արձագանք լինել» Ուկրաինայում տեղի ունեցող իրադարձություններին: «Հարկավոր է հիշել, որ այդ ճգնաժամը պայմանավորված է քաղաքականության ու անվտանգության հարցերով, դա հումանիտար ճգնաժամ չէ»,- ասել է նա լրագրողներին:

Հունիսի 2-ին Բրյուսելում տեղի է ունեցել Ռուսաստան-ՆԱՏՕ խորհրդի արտահերթ նիստը` նվիրված Ուկրաինայի իրադրությանը: Հյուսիսատլանտյան դաշինքի պաշտոնական ներկայացուցիչ Օանա Լունգեսկուն, ամփոփելով նիստի արդյունքները, հայտարարել է, որ Ուկրաինայի իրադրության վերաբերյալ ՆԱՏՕ-ի և Ռուսաստանի դիրքորոշումները խորապես տարբերվում են:

Իր հերթին ՆԱՏՕ-ին առընթեր ՌԴ-ի մշտական ներկայացուցիչ Ալեքսանդր Գրուշկեն հայտնել է, որ Մոսկվան կոչ է արել Ռուսաստան-ՆԱՏՕ խորհրդի անդամներին՝ Կիևից պահանջել անհապաղ դադարեցնել ուժային գործողությունը երկրի հարավ-արևելքում, ինչպես նաև ձեռնամուխ լինել Ժնևի պայմանավորվածությունների և ԵԱՀԿ-ի «ճանապարհային քարտեզի» կատարմանը, հաղորդել է ԻՏԱՌ-ՏԱՍՍ-ը: