«Վաղն Իսպանիան կդառնա հանրապետություն». երկրում զանգվածային ցույցեր են

Մի քանի տասնյակ հազար մարդ է դուրս եկել Իսպանիայի 60-ից ավելի քաղաքների փողոցներ միապետության ապագայի շուրջ հանրաքվե անցկացնելու պահանջով այն բանից հետո, երբ հայտնի դարձավ, որ Խուան Կառլոս Առաջին թագավորը հրաժարվել է գահից, տեղեկացնում է Guardian թերթը:

Գլխավոր ցույցերը հունիսի 2-ի երեկոյան տեղի են ունեցել Մադրիդի Պուերտա դել Սոլ հրապարակում, որտեղ հավաքվել էր շուրջ 20 հազար ցուցարար, և Բարսելոնի Կատալոնիա հրապարակում, որտեղ նույնպես հազարավոր մարդիկ էին հավաքվել: Թերթը նշում է, որ համանման հանրահավաքներ են տեղի ունեցել նաև Իսպանիայի սահմաններից դուրս՝ Եվրոպայի և Լատինական Ամերիկայի 30 քաղաքներում: Wall Street Journal հրատարակության տվյալներով՝ ցուցարարները թափահարում էին Իսպանիայի Երկրորդ հանրապետության դրոշները և վանկարկում՝ «Վաղն Իսպանիան կդառնա հանրապետություն»:

Ավելի վաղ հաղորդվել է, որ այն բանից անմիջապես հետո, երբ հայտնի դարձավ գահից Խուան Կառլոս Առաջին թագավորի հրաժարվելու մասին, իսպանացիների մի մասը հանդես է եկել արքայազն Ֆելիպեի կողմից գահաժառանգման դեմ` պահանջելով անցկացնել հանրաքվե՝ որոշելու արդյոք երկիրը կմնա միապետություն, թե կդառնա հանրապետություն: Քաղաքական երեք կուսակցություններ՝ «Միավորված ձախերը», «Մենք կարող ենք» և «Էկուոն», պաշտպանել են ակտիվիստներին, հաղորդել է ՌԻԱ Նովոստին: