«Թուրքիան այլևս հեղաշրջումներ թույլ չի տա երկրում». Էրդողան

Թուրքիայում այլևս երբեք հեղաշրջումներ չեն լինի, և թուրք ժողովուրդը խստորեն կպատժի խռովությունների կողմնակիցներին: Հայտարարել է Թուրքիայի վարչապետ Ռեջեբ Թայիբ Էրդողանը:

Էրդողանը նշել է, որ թուրքական կառավարությունը երկիրը փրկել է սիրիական և եգիպտական իրադարձությունների կրկնվելուց:

«Արտասահմանում գտնվող ուժերը, այդ թվում` նաև Փենսիլվանիայում գտնվող մարդը (նկատի ունի Ֆեթուլլահ Գյուլենին) թուրքական ընդդիմությունն օգտագործել են սեփական նպատակների համար»,- ասել է Էրդողանը:

Թուրք վարչապետը հայտարարել է, որ ապացույցներ կան գլխավոր ընդդիմադիր Ժողովրդահանրապետական կուսակցության և Գյուլենի շարժման միջև կապերի մասին: Էրդողանի խոսքով` արտասահմանյան ուժերը, օգտագործելով Թուրքիայի քաղաքական ուժերը, ցանկանում են խոչընդոտել երկրի տնտեսական զարգացումը:

«Չնայած Թուրքիայի դեմ նախաձեռնվող ամբողջ քարոզչությանն ու ջանքերին, Անկարան կվերացնի այդ բոլոր խոչընդոտները»,- ընդգծել է Էրդողանը: Նրա խոսքով` երկրում վերջին իրադարձությունները թանկ են նստել Թուրքիայի վրա:

Դեկտեմբերի կեսերին Թուրքիան ցնցած կոռուպցիոն սկանդալից հետո, որով բացահայտվել էր թուրքական կառավարության անդամների, այդ թվում` վարչապետի, նրա որդու, փեսայի և դստեր խոշոր կոռուպցիոն գործարքները, Էրդողանը հայտարարել է, որ դրա հետևում կանգնած են «գյուլենական համայնքի» հետևորդները, ովքեր ցանկանում են տապալել իր կառավարությունը:

«Հիզմեթ Հարեքեթի» ազդեցիկ կրոնական կազմակերպության առաջնորդ Ֆեթուլլահ Գյուլենի շարժումը, որը համարվում է նաև նուրսիստների (նուրչուլար) շարժում, արդի իսլամ քարոզող հզոր շարժում է: Այն քարոզում է իսլամական չափավորություն, հանդուրժողականություն, միջկրոնական երկխոսություն, իսլամի և ժողովրդավարության համատեղելիություն: Գյուլենի համայնքը Թուրքիայում, Ադրբեջանում և մի շարք երկրներում ունի դպրոցներ, թերթեր, ֆինանսական կառույցներ, հասարական կազմակերպություններ:

Ֆեթուլլահ Գյուլենը 1999 թվականից բնակվում է ԱՄՆ-ի Փենսիլվանիա նահանգում: Գյուլենը ստիպված է եղել տեղափոխվել ԱՄՆ 1997 թվականին` Թուրքիայում տեղի ունեցած ռազմական հեղաշրջումից հետո որպես իսլամական գործչի` իր նկատմամբ սկսված քրեական հետանպդման պատճառով: Վերջին շրջանում թուրքական իշխանությունները առճակատման մեջ են «գյուլենական ուժերի» հետ և Ֆեթուլլահ Գյուլենին մեղադրում են Թուիրքիան վարկաբեկող և պառակտող գործունեություն ծավալելու մեջ: