Աշխարհազորը Լուգանսկում գրավել է զորամասը

Ուկրաինայում աշխարհազորի մարտիկները հունիսի լույս 4-ի գիշերը գրավել են ներքին զորքերի՝ Լուգանսկում տեղաբաշխված զորամասը: Այդ մասին հաղորդել է ԻՏԱՌ-ՏԱՍՍ-ը՝ վկայակոչելով դիմադրության ներկայացուցիչների: Զինծառայողներն անձնատուր են եղել:

Ուժայինների և ապստամբների միջև փոխհրաձգությունն սկսվել էր հունիսի 3-ի երեկոյան: Ընդհարման ժամանակ տեղի է ունեցել հուժկու պայթյուն, որին հետևել է հրդեհ: Հաղորդվել է, որ զորամասի գնդակոծման ընթացքում կիրառվել է ծանր զենք՝ ինքնաձիգներ, ականանետներ և գնդացիրներ, գրոհին մասնակցել է շուրջ 300 աշխարհազորային:

Լուգանսկում իրադրությունը սրվել էր հունիսի 2-ի գիշերը, երբ մի քանի հարյուր աշխարհազորայիններ՝ զինված ավտոմատ զենքով և նռնականետներով, գրոհել էին քաղաքում գտնվող սահմանապահ զորամասի վրա: Սկսված մարտում, ըստ զանգվածային լրատվամիջոցների տվյալների՝ երկուստեք զոհվել էր ավելի քան տասը մարդ:

Նույն օրն օդից գնդակոծվել էր մարզային վարչակազմի շենքը: Դրա հետևանքով, վերջին տվյալներով, զոհվել է ութ մարդ, այդ թվում՝ առողջապահության նախարար Նատալյա Արխիպովան: Եվս 28 մարդ հիվանդանոց է տեղափոխվել` տարբեր աստիճանի ծանրության վերքերով: