Բուրջանաձեն «բացարձակ անարդյունավետ» է համարել Վրաստանի ներկայիս ղեկավարության գործունեությունը

«Ժողովրդավարական շարժում-Միասնական Վրաստան» կուսակցության առաջնորդ Նինո Բուրջանաձեն դաժան, բայց արդյունավետ է որակել երկրի նախկին կառավարող կուսակցությունը՝ «Միասնական ազգային շարժումը», որը գլխավորում է հանրապետության նախկին նախագահ Միխեիլ Սաակաշվիլին: Դրա հետ մեկտեղ նա անարդյունավետ է համարել Վրաստանի Վրաստանի ներկայիս ղեկավարության գործունեությունը:

«Անկեղծ ասած` «Ազգային շարժումը» դաժան, բայց արդյունավետ կառավարող կուսակցություն էր: Ինչ էլ որ նրանք ծրագրեին՝ լավ, թե վատ, անում էին դա: Իսկ ներկայիս կառավարությունը բացարձակ անարդյունավետ է»,- հայտարարել է Բուրջանաձեն «Ասավալ-դասավալի» թերթին տված հարցազրույցում:

Սաակաշվիլիի երբեմնի զինակիցը` Վրաստանի խորհրդարանի նախկին խոսնակ Նինո Բուրջանաձեն, իշխող կուսակցության շարքերը լքել է 2008 թվականին և անցել է ընդդիմության կողմը` դառնալով նրա առաջնորդներից մեկը: Քաղաքական ասպարեզում «Վրացական երազանք» կոալիցիայի հայտնվելուց հետո զգալի փոփոխություններ տեղի ունեցան ընդդիմության մեջ ուժերի վերադասավորման տեսանկյունից: Սկզբում Բուրջանաձեն դրական գնահատեց Վրաստանի քաղաքականության մեջ միլիարդատեր Բիձինա Իվանիշվիլիի կոալիցիայի հայտնվելը, չնայած այն բանին, որ համագործակցությունը չկայացավ: Նա դրական գնահատեց «Վրացական երազանքի» հաղթանակը 2012 թվականի խորհրդարանական ընտրություններում, ինչպես նաև 2013 թվականի հոկտեմբերի նախագահական ընտրություններում: Դեռ ավելին` Բուրջանաձեն հայտարարեց, որ կոալիցիային ժամանակ կտա դրսևորելու իրեն և չի քննադատի նրա՝ որպես իշխող ուժի, գործունեությունը, հաղորդել է «Նովոստի Գրուզիան»: