Էրդողանը CNN-ի թղթակցին մեղադրել է լրտեսության մեջ. ԱՄՆ-ն հերքում է մեղադրանքը

Թուրքիայի վարչապետ Ռեջեփ Թայիփ Էրդողանն իր գլխավորած' իշխող «Արդարություն և զարգացում» կուսակցության ակտիվի հավաքում ամերիկյան CNN լրատվամիջոցի թղթակցին մեղադրել է Թուրքիայի դեմ լրտեսության մեջ: Թուրք վարչապետն ասել է, որ ամերիկյան հեռուստաալիքի լրագրողները «նպատակային կերպով կրքերը բորբոքել են, և դա անցյալ չորեքշաբթի Թաքսիմ հրապարակում դիմակայության պատճառ է դարձել»:

«Միջազգային ԶԼՄ-ները Ստամբուլ են եկել սադրիչ և ուռճացված ռեպորտաժներ պատրաստելու համար, բայց վերադարձել են ձեռնունայն»,-հայտարարել է Էրդողանը:

Ամերիկյան հրատարակչությունը հայտնել է, որ չորեքշաբթի Ստամբուլի Թաքսիմ հրապարակից, որտեղ հակակառավարական զանգվածային բողոքի ակցիա էր տեղի ունենում, թուրքական ոստիկանությունը բերման է ենթարկել CNN-ի թղթակիցներին և մեղադրել լրտեսության մեջ: «Թուրքիայի ոստիկանության հրամանատարը կես ժամ հետո մեզ ազատ արձակեց: Սպան ինձնից ներողություն խնդրեց մի այլ սպայի կողմից ինձ հասցված աքացիի համար», -Twitter-ի իր էջում գրառել է հեռուստաալիքի թղթակից Այվեն Ուոսթոնը:

Չորեքշաբթի երեկոյան Էրդողանը հայտարարել է, որ Ուոսթոնը Թուրքիա է եկել «քաոս ստեղծելու» համար և նրան անվանել «գործի մեջ բռնված լակեյ»:

ԱՄՆ պետքարտուղարության ներկայացուցիչ Մարի Հարֆը հերքել է ամերիկյան լրատվամիջոցների, մասնավորապես' CNN-ի կողմնապահության առնչությամբ Էրդողանի մեղադրանքը' նշելով, որ CNN-ն անկախ լրատվամիջոց է:

«ԱՄՆ-ն աջակցում է Թուրքիայում խոսքի ազատությանը, ինչն ամերիկացի թղթակցին թույլ է տալիս լուսաբանել երկրի ներսում տեղի ունեցող իրադարձությունները»,- ասել է Մարի Հարֆը: