Վրաստանի նախագահը չգիտի՝ հարկավոր է արդյոք իր ներկայությունը Բրյուսելում ԵՄ-ի հետ համաձայնագրի ստորագրմանը

Վրաստան 5 Հունիս, 2014 15:46

Վրաստանի նախագահ Գեորգի Մարգվելաշվիլին հայտարարել է, թե չգիտի՝ ինքը կլինի արդյոք այն պատվիրակության կազմում, որը հունիսի վերջին Թբիլիսիից կուղևորվի Բրյուսել` ստորագրելու ԵՄ-ի հետ ասոցացման համաձայնագիրը:

«Որոշումը կընդունվի ոչ թե իմ ցանկությամբ, այլ ելնելով անհրաժեշտությունից»,- լրագրողներին ասել է Գեորգի Մարգվելաշվիլին՝ մեկնաբանելով վարչապետ Իրակլի Ղարիբաշվիլիի հայտարարությունը, որն ասել է, թե իրեն հայտնի չէ` կլինի արդյոք այն բանի անհրաժեշտությունը, որ երկրի նախագահը ներկա լինի Բրյուսելում կայանալիք արարողությանը:

«Ես կարծում եմ` այդ հարցը ցանկությամբ չեն լուծում: Այն երկրները, որտեղ նման դեպքերում այդ հարցը լուծվում է ցանկությամբ, ժողովրդավարական չեն և հիմնված չեն իրավունքի նորմերի ու երկրի գերակա շահերի վրա: Բնականաբար, այդ հարցը կանտեսվի և որոշումը կընդունվի՝ ոչ թե իմ ցանկությամբ, այլ ելնելով անհրաժեշտությունից»,- ասել է Մարգվելաշվիլին:

Եվրամիության հետ ասոցացման համաձայնագիրն ստորագրվելու է հունիսի 27-ին Բրյուսելում, որտեղ հավաքվելու են ԵՄ-ի անդամ երկրների կառավարությունների ղեկավարները: Վրաստանից փաստաթղթի տակ ստորագրելու է վարչապետ Իրակլի Ղարաբաշվիլին:

Մարգվելաշվիլին ավելի վաղ հայտարարել է, թե կարծում է, որ ԵՄ-ի հետ ասոցացման համաձայնագիրը պետք է ստորագրի նախագահը, սակայն մտադիր չէ «վիճարկել» հայտարարված որոշումն այն մասին, որ փաստաթուղթը կստորագրի վարչապետը:

Նախօրյակին Վրաստանի վարչապետ Իրակլի Ղարիբաշվիլին կտրականապես հերքել է իր և նախագահ Գեորգի Մարգվելաշվիլիի միջև իբր գոյություն ունեցող տարաձայնությունների վերաբերյալ լուրերը և լրագրողներին կոչ է արել դրամատիկ գույներով չներկայացնել այդ թեման: «Ոչ մի տարաձայնություն իմ և Մարգվելաշվիլիի միջև գոյություն չունի… Մենք սովորական հարաբերություններ ունենք, ինչպիսին պետք է ունենան վարչապետը և նախագահը»,-ասել է Ղարիբաշվիլին:

Նա հայտարարել է, որ «մեր արձանագրած տարբեր դիրքորոշումները նշանակում են, որ երկրում առկա է իրական ժողովրդավարություն, ուստի ոչ մի ողբերգություն չկա, դեռ ավելին, նորմալ է, երբ նախագահը և վարչապետը միանման չեն մտածում, չնայած նույն քաղաքական թիմի մեջ են»: