Լոնդոնում այրվում է Եվրամիության ամենաբարձր շենքը՝ Shard երկնաքերը

Հրդեհ է բռնկել Եվրամիության ամենաբարձր շենքում՝ Լոնդոնի Shard երկնաքերում: Բռնկման օջախը գտնվում է 309,6-մետրանոց շենքի ստորին հարկերում: Ինչպես հաղորդում է Sky News հեռուստաալիքը, միջադեպի վայր է ժամանել յոթ հրշեջ մեքենա: Հրշեջների ընդհանուր թիվը հասնում է 55-ի, նրանք հետազոտում են կառույցը: Շենքից շտապ կարգով տարհանում են մարդկանց:

Միջադեպի վայր են ժամանել շտապ օգնության մեքենաներ: «Մենք պնդեցինք, որ տարհանվեն բոլոր նրանք, ովքեր գտնվում էին շենքում: Ընդամենը շենքից դուրս է եկել շուրջ 900 մարդ: Տարհանումը նախազգուշական բնույթ է կրում»,- ընդգծել է Մեծ Բրիտանիայի մայրաքաղաքի հրշեջ ծառայության ներկայացուցիչ Քելլի Ֆոսթերը:

Թեմզայի հարավային ափին, որտեղ գտնվում է երկնաքերը, փակվել են բազմաթվի փողոցներ, փակ են նաև մետրոյի կայարանները: Shard-ի բարձրությունը (թարգմանաբար՝ «բեկոր») 309,6 մետր է: Շենքի կառուցումն ավարտվել է 2012 թվականի հուլիսի 5-ին: Դրանում տեղավորված են առևտրական կենտրոններ, գրասենյակային հարկաբաժիններ, ձմեռային պարտեզներ, ռեստորաններ, 200 համարից բաղկացած Shangri La հյուրանոցը, մասնավոր կացարաններ և դիտահարթակներ: Երկնաքերի շինարարությունը նստել է 1,5 մլրդ ֆունտ (2,35 մլրդ դոլար): Մերձավորարևելյան ներդրողների պահանջով՝ 87-հարկանի շենքի հարկաբաժինններում չկան ալկոհոլի արտադրության ու խաղային բիզնեսի հետ կապված ընկերություններ: Աշխարհի երկնաքերների վարկանիշում Shard-ն զբաղեցնում է 59-րդ տեղը:

Այն ցածր է Նյու Յորքի 443-մետրանոց Empire State Building-ից և աշխարհի ամենաբարձր շենքից՝ Դուբայի 829-մետրանոց «Բուրջ Խալիֆ» աշտարակից, հաղորդել է ԻՏԱՌ-ՏԱՍՍ-ը: