Թուրքիայում համալսարանի պրոֆեսորը գլխատել է դոցենտին

Թուրքիայի Քոնյա քաղաքի Սելջուկյան համալսարանում երեկ գլխատված վիճակում հայտնաբերված Ճարտարապետական ֆակուլտետի 42-ամյա դոցենտ Ջալալադին Օզդեմիրին սպանել է նույն համալսարանի քիմիական ֆակուլտետի բաժիններից մեկի ղեկավար Ահմեդ Գ.-ն: Այս մասին, ինչպես հաղորդում է «Արմենպրես»-ը, հայտնում է CNNTurk հեռուստաալիքը:

Թուրքական «Հաբերլեր» լրատվական կայքը երեկ հայտնել էր, որ Քոնյա քաղաքի Սելջուկյան համալսարանի դոցենտ Ջալալադին Օզդեմիրին իր աշխատասենյակում հայտնաբերել են գլուխը կտրված վիճակում: Նրա ընտանիքը հայտնել էր, որ Օզդեմիրն անհայտացել է երկու օր առաջ, և բոլոր որոնումներն ապարդյուն անցնելուց հետո դիմել էր համալսարան, որտեղ նա աշխատում էր: Համալսարանի ղեկավարության խնդրանքով իրավապահ մարմինները բացել են դոցենտի աշխատասենյակը և հայտնաբերել նրան գլուխը կտրված վիճակում: Նրա մարմնի վրա դանակի հարվածների հետքեր էլ են եղել:

Ահմեդ Գ.-ն խոստովանել է, որ Օզդեմիրին ինքն է սպանել: «Երկու օր առաջ մենք վիճեցինք մի կնոջ համար: Ուսանողները ևս դարձան մեր վիճաբանության վկան: Նա ինձ վիրավորեց ուսանողների մոտ», -ասել է մարդասպան պրոֆեսորը, ով նույն համալսարանի ճարտարագիտական ֆակուլտետի դեկան Հանդան Գ.-ի ամուսինն է: Ենթադրվում է, որ Սելջուկյան համալսարանի պրոֆեսորն ու դոցենտը սիրահարված են եղել միևնույն կնոջը, և սպանությունը կատարվել է խանդի հողի վրա: