Ձերբակալվել է Նազարբաևի նախկին փեսան՝ Ռահատ Ալիևը

Վիեննայում կալանավորվել է Ղազախստանի նախագահի նախկին փեսան՝ Ռահատ Ալիևը: Այդ մասին հաղորդել է Ավստրիայի Austria Presse Agentur գործակալությունը՝ վկայակոչելով նրա փաստաբան Մանֆրեդ Այնդտերին:

Ալիևի պաշտպանի խոսքով՝ Նուրսուլթան Նազարբևի նախկին փեսան կամավոր հանձնվել է Վիեննայի իշխանություններին:

Նախագահի երբեմնի ազդեցիկ փեսան՝ Ալիևը, տարբեր տարիների բարձր պաշտոններ է զբաղեցրել Ղազախստանի Ազգային անվտանգության կոմիտեում, հարկային ծառայությունում և ԱԳ նախարարությունում, ինչպես նաև Ղազախստանի դեսպանն է եղել Ավստրիայում:

2008 թվականին շնորհազրկված Ալիևը հեռակա դատապարտվել է երկարատև բանտարկության հանցավոր խմբի կազմակերպման, մարդկանց առևանգման և իշխանության զավթում նախապատրաստելու համար:

2011 թվականին Ղազախստանում Ալիևի դեմ հարուցվել է ևս մեկ գործ, այս անգամ նախկին փեսային կասկածել են երկրի խոշորագույն բանկերից մեկի բարձրաստիճան կառավարիչներից մեկի սպանության մեջ:

Ալիևը, որն ամուսնացած է եղել նախագահի ավագ դստեր՝ Դարիգա Նազարբաևայի հետ, մեղադրանքները համարել է քաղաքականապես պատճառաբանված և կապված իր քաղաքական հավակնությունների և 2012 թվականին նախագահի պաշտոնում իր թեկնածությունն առաջադրելու հետ: