Նորմանդիայում Պուտինը և Պորոշենկոն հասցրել են շփվել

Նորմանդիայում` Ֆրանսիայի նախագահի կազմակերպած պաշտոնական ընթրիքի ընթացքում, Ռուսաստանի նախագահ Վլադիմիր Պուտինը մի քանի րոպե շփվել է Ուկրաինայի նորընտիր նախագահ Պյոտր Պորոշենկոյի և Գերմանիայի կանցլեր Անգելա Մերկելի հետ: Այս մասին հայտնում է ria.ru-ն:

«Երկու առաջնորդների խոսակցությունը տեղի է ունեցել ընդհանուր կազմով լուսանկարվելուց առաջ: Վլադիմիր Պուտինը մի քանի րոպե շփվել է Ուկրաինայի նորընտիր նախագահ Պյոտր Պորոշենկոյի և Գերմանիայի կանցլեր Անգելա Մերկելի հետ»,- ասվում է հաղորդագրության մեջ:

Reuters գործակալությունը, վկայակոչելով Ֆրանսիայի նախագահի գրասենյակը, հայտնել է, որ հանդիպումը կազմակերպվել էր Ֆրանսիայի նախագահ Ֆրանսուա Օլանդի նախաձեռնությամբ: Հաղորդագրության համաձայն՝ հանդիպումից առաջ, որը տևել է 15 րոպե, Պուտինը և Պորոշենկոն միմյանց ձեռք են սեղմել:

Օլանդի գրասենյակում այն կարծիքին են, որ Ռուսաստանի և Ուկրաինայի նախագահների հանդիպումը կարող է առաջին քայլը դառնալ Մոսկվայի կողմից Ուկրաինայի ընտրությունների ճանաչման հարցում: