«Այս հրաշալի մզկիթը կառուցել է մի հայ ճարտարապետ». Էրդողան

Թուրքիայի վարչապետ Ռեջեբ Թայիբ Էրդողանը և այլ բարձրաստիճան ղեկավարներ մասնակցել են Ստամբուլի Օրթաքյոյ թաղամասում Նիկողոս Բալյանի (1826-1858 թթ.) կառուցած մզկիթի վերաբացման հանդիսավոր արարողությանը: Այս մասին հայտնում է թուրքական «Բուգյուն» թերթը:

Խոսելով մզկիթի կառուցման պատմությունից` Էրդողանը նշել է, որ այն կառուցվել է հայ ճարտարապետի կողմից:

«Այս հրաշալի մզկիթը կառուցել է մի հայ ճարտարապետ: Այս մզկիթը մյուսների շարքում առանձնահատուկ տեղ է զբաղեցնում և պետք է ժողովուրդն արժանին մատուցի կառույցի ճարտարապետին և շինարարներին»,- ասել է Էրդողանը և նշել, որ խոսքը Բալյանների ընտանիքի մասին է:

Օսմանյան կայսրությունում Բալյանների ընտանիքի անդամները նախագծել և կառուցել են բազմաթիվ շենքեր, կամուրջներ, պալատներ, եկեղեցիներ և մզկիթներ:

Նիկողայոս Բալյանը Ստամբուլում մի շարք պալատներ, մզկիթներ, ամառանոցներ, զորանոցներ, դպրոցներ է կառուցել: Օրթաքյոյի մզկիթը Նիկողայոս Բալյանը կառուցել է 1853-1854 թվականներին: Բալյանների ընտանքիը նոր շունչ է բերել օսմանյան ճարտարապետական արվեստի մեջ` համադրելով օսմանյան միջնադարյան հայազգի ճարտարապետ Սինանի ավանդույթները և արևմտյան ճարտարապետական ոճերը: Բալյան ընտանիքի ճարտարապետների մոտ չորս սերնդի ներկայացուցիչներ համարվել են օսմանյան արքունիքի ճարտարապետներ: Նրանց ստեղծած նրբաճաշակ կառույցները զարդարում են Ստամբուլը և նրան եվրոպական տեսք տալիս: