ՀԱԿ–ը չի խոչնդոտել Վանուշ Խանամիրյանի հոգեհանգիստը Օպերայում կազմակերպելուն

Ազատության հրապարակում ՀՀՇ վարչության նախագահ Արամ Մանուկյանը այսօր հատուկ լրատվամիջոցների համար հայտարարություն արեց. «Երեկ Վանուշ Խանամիրյանի հուղարկավորության հետ կապված կառավարական հանձնաժողովը խնդրեց, որ ես էլ մասնակցեմ իրենց հավաքին, որպեսզի համատեղ ծրագրենք, թե ինչպես պետք է կազմակերպվի հուղարկավորությունը։ Ես մասնակցեցի, տարբեր առաջարկներ եղան։ Իրենց առաջարկներից մեկն էլ այն էր, որ Օպերայից լինի թաղումը, մենք միջանցք բացենք, և նրան այստեղից տանեն հուղարկավորության։ Մենք էսօր էլ Լևոն Զուրաբյանի հետ միասին խոսել ենք ոստիկանների հետ ու ասել, որ պատրաստ ենք, մեզ համար կարևոր չէ, թե ինչ քաղաքական կողմնորոշում է ունեցել այդ մարդը, նա մշակութային հզոր գործիչ էր։ Մեր կողմից որևէ առարկություն չի եղել հոգեհանգստի արարողությունն այստեղ կազմակերպելու հարցում, ընդհակառակը, ասեցինք, որ մեր ժողովուրդն էլ կմասնակցի։

Ցավոք, այսօր որոշ լրատվամիջոցներ գրեցին, որ ՀԱԿ–ը խոչնդոտել է Վանուշ Խանամիրյանի հոգեհանգիստը Օպերայում կազմակերպելուն։ Նորից եմ ասում՝ այդպիսի բան չի եղել, իսկապես պատրաստ ենք եղել համատեղ էդ միջոցառումը կազմակերպել։Մենք քաղաքացիական հանդուրժողականության կողմնակից ենք»,- հայտարարեց Արամ Մանուկյանը։

Ազատության հրապարակում մեկ րոպե լռությամբ հարգեցին Վանուշ Խանամիրյանի հիշատակը՝ պայմանավորվելով վաղը բոլորը միասին մասնակցել պարարվեստի լեգենդի հուղարկավորության արարողությանը։

«Վաղվա միտինգը շատ կարևոր միտինգ է։ Վաղվա հանրահավաքի ժամանակ կորոշենք մեր հետագա անելիքներն ու մարտահրավերները։ Վաղը լինելու է նաև երթ»,- հայտարարեց Նիկոլ Փաշինյանը։