Վաշինգտոնում ցուցարարները փորձել են ներթափանցել Ավիացիայի ազգային թանգարան

Այսօր ցուցարարները Միացյալ Նահանգների մայրաքաղաքի ամենահայտնի թանգարաններից մեկը հանդիսացող Ավիացիայի և տիեզերագնացության ազգային թանգարան էին փորձել մուտք գործել, ինչն էլ ստիպել էր թանգարանի ղեկավարությանը փակել թանգարանը որոշ ժամանակով, տեղեկացնում է  RIA Novosti –ին՝ հղում տալով Ռոյթերս գործակալությանը:

Թանգարանի ներկայացուցիչ Իզաբել  Լերայի խոսքերով, շաբաթ երեկոյան 150 – 200 մարդ պաստառներով փորձել են մուտք գործել թանգարան, սակայն թանգարանի անվտանգության վեց աշխատակիցները դիմադրել են նրանց: Արդյունքում փոքրիկ բախում էր առաջացել, և անվտանգության աշխատակիցներից մեկը ստիպված է եղել արցունքաբեր գազ օգտագործել, որպեսզի հնարավոր լինի ցրել ամբոխը:

Իզաբել Լերայի խոսքերով, անվտանգության աշխատակիցների ու ցուցարաների բախման ժամանակ ոչ ոք չի տուժել. ձերբակալվել է մեկ մարդ, իսկ թանգարանը կրկին բաց կլինի այցելուների առջև արդեն այսօր՝ կիրակի:

Ըստ ակցիայի կազմակերպիչների ` «Վերցրու Կոլումբիայի շրջանը» (Occupy D.C. ), նմանատիպ քայլերով կոչ է արվում ԱՄՆ–ի իշխանություններին՝ հրաժարվել արտասահմանում ծավալած ռազմական գործողություններից:  Ակցիան նվիրված էր Աֆղանստանում Ամերիկյան ռազմական գործողության տասնամյակին: 

Ներկա պահին ԱՄՆ–ի մի շարք քաղաքներում անցնում են բազմամարդ մեկ այլ ակցիա նմանատիպ անվանմամբ` «Վերցրու Ուոլ Սթրիթը»: Այս ակցիան մեկնարկել է սեպտեմբերի   17–ին Նյու Յորքում և պայքարում է իշխանությունների քաղաքականության և ֆինանսական ինստիտուտների դեմ` անվանելով նրանց գործունեությունը « ֆինանսական տեռոր » :