Հովիկ Աբրահամյանն այցելել է Հանքավանի «Լուսաբաց» ճամբար

Վարչապետ Հովիկ Աբրահամյանն հուլիսի 20-ին այցելել է Հանքավանի «Լուսաբաց» ճամբար, որտեղ ՀՀ պետական բյուջեի միջոցներով իրականացվող «Դպրոցականների ամառային հանգստի կազմակերպում» ամենամյա ծրագրով այս տարի հանգստանում է Հայաստանից, Արցախից և Ջավախքից ժամանած շուրջ 350 երեխա:

Կառավարության ղեկավարը շրջել է ճամբարում, ծանոթացել հանգստի կազմակերպման և սննդի պայմաններին, զրուցել երեխաների հետ, հետաքրքրվել նրանց առօրյայով:

Հովիկ Աբրահամյանը, ողջունելով ճամբարականներին, նշել է, որ կառավարությունն ամեն ինչ անելու է զոհված, հաշմանդամ դարձած զինծառայողների, ծնողազուրկ ու uակավ ապահովված բազմազավակ ընտանիքների երեխաների հանգիստը լավագույնս կազմակերպելու համար: Վարչապետն ընդգծել է, որ կառավարությունը ջանքեր չի խնայելու մատաղ սերնդի համար բարեկեցիկ ապագա և բարձրորակ կրթություն ապահովելու համար: Իրենց հերթին, ճամբարականները շնորհակալություն են հայտնել վարչապետին՝ հանգստի հնարավորություն ընձեռելու համար:

Յուրաքանչյուր տարի ՀՀ կառավարությունն իրականացնում է դպրոցականների ամառային հանգստի կազմակերպման ծրագիր' Հանքավանի «Լուսաբաց», «Հասմիկ», «Արագած», «Հեքիաթային կիրճ» և Ծաղկաձորի «Աղբյուր» ճամբարներում: ՀՀ վարչապետի որոշմամբ ծրագրի շահառուներ են սահմանվել Երևանի, ՀՀ բոլոր մարզերի, Արցախի և Ջավախքի զոհված, հաշմանդամ դարձած զինծառայողների, ծնողազուրկ ու uակավ ապահովված բազմազավակ ընտանիքների 7-13 տարեկան երեխաները:

2015 թ. ճամբարային ծրագրով կհանգստանա շուրջ 4500 երեխա՝ 3 հերթափոխով, 20-ական օրով, յուրաքանչյուր հերթափոխում՝ 1500 երեխա: Այս տարի 1-ին հերթափոխին ԼՂՀ-ի երեխաների համար հատկացվել է 200, ջավախահայ երեխաների համար՝ 150 տեղ: