Իշխանության ներսում ինչ-որ լուրջ գործընթացներ են ընթանում. «Ժողովուրդ»

«Ժողովուրդ» օրաթերթը գրում է. «Անցած շաբաթ օրը անսպասելի կադրային փոփոխություններ տեղի ունեցան նախագահական նստավայրում: Իր զբաղեցրած պաշտոնից ազատվեց Սերժ Սարգսյանի մամուլի քարտուղար Արման Սաղաթելյանը, իսկ նրա փոխարեն այդ պաշտոնում նշանակվեց Վլադիմիր Հակոբյանը: Հատկապես ուշագրավ է Սերժ Սարգսյանի նոր մամուլի քարտուղարի ընտրության հարցը: Բանն այն է, որ Վլադիմիր Հակոբյանի աշխատանքային կարիերան սկսվել եւ մինչեւ նոր պաշտոնի նշանակումը շարունակվել է ՀՀ ազգային անվտանգության ծառայության համակարգում: Նա կոչումով մայոր է: Պաշտոնական կենսագրության մեջ նշվում է, որ մինչ այս զբաղեցրել է ՀՀ ԱԱԾ գլխավոր վարչության բաժանմունքի պետի պաշտոնը, իսկ կոնկրետ զբաղմունքի եւ դրա մամուլի հետ առնչության մասին ոչինչ չի ասվում:

Սակայն վերջին տարում Վլադիմիր Հակոբյանի անունը մամուլում հաճախակի է հիշատակվում որպես լրագրողներին հավաքագրել փորձող ԱԱԾ աշխատակցի: Այսինքն՝ եթե մինչ այս նախագահի մամուլի քարտուղարի պաշտոնը զբաղեցնում էին լրատվության աշխարհի ներկայացուցիչները, քանի որ նրանց հիմնական աշխատանքը ի պաշտոնե լրագրողների հետ շփումն է, այս անգամ լրատվական դաշտի վերահսկողությամբ զբաղված անձն է խոսնակ դարձել: Կասկածից վեր է, որ իշխանության ներսում ինչ-որ լուրջ գործընթացներ են ընթանում, եւ այս նշանակումը դրանց դրսեւորումներից է:

Մանրամասն՝ թերթի այսօրվա համարում