«Մոլդե»-ն արժանիորեն դուրս եկավ ՉԼ-ի հաջորդ փուլ. Սարգիս Հովսեփյան

«Փյունիկ»-ի գլխավոր մարզիչ Սարգիս Հովսեփյանի կարծիքով՝ նորվեգական «Մոլդե»-ն արժանիորեն դուրս եկավ ՈՒԵՖԱ-ի Չեմպիոնների լիգայի հաջորդ փուլ:

«Մենք ուշադիր էինք: Իրենք հաղթել էին 5-0 հաշվով, ուշադրություն չէին դարձնում առաջին գծին և միայն պաշտպանվում էին: Իրենք մտածում էին, որ թեկուզ 1-0 պարտվեն, բայց դուրս գան հաջորդ փուլ: Ես կցանկանայի նորից կրկնել, որ «Մոլդե»-ն լավ ակումբ է, և համակարգված ֆուտբոլ էր խաղում: Իմ կարծիքով՝ «Մոլդե»-ն արժանիորեն դուրս եկավ հաջորդ փուլ»,- լրագրողների հետ զրույցում նշեց Հովսեփյանը:

Նա խոսեց նաև Սեզար Ռոմերոյի մասին. «Ռոմերոյի պայմանագիրը վերջանացել է, և որոշել ենք, որ եթե նա չի մնում թիմում, ապա հանդիպման կմասնակցեն այն տղաները, ովքեր կօգնեն թիմին Հայաստանի առաջնությունում: Նրանց համար լավ փորձ կլինի: Որոշել ենք, որ այն ֆուտբոլիստը, ով չի օգնի թիմին առաջնությունում, չի կարող մասնակցել այս հանդիպմանը: Այո, գուցե Ռոմերոյի հետ «Փյունիկ»-ն այլ թիմ է, իսկ առանց նրա՝ մեկ այլ թիմ: Իսկ այն Ռոմերոն, ում տեսանք մրցաշրջանի վերջում, ավելի շատ մեզ վնաս էր տալիս թե' պահվածքո վ, թե՚ մարզավիճակով:»:

Հայ մասնագետը փաստեց նաև, որ «Փյունիկ»-ը փորձում է նոր ֆուտբոլիստ գտնել, ցանկալի կլինի որ նա լինի հայ, ոչ թե լեգիոնական ֆուտբոլիստ: