Հայերն Օսմանյան կայսրությունում բնաջնջվել են միայն հայ լինելու համար. բելգիացի խորհրդարանական

Քեմալից (Մուստաֆա Քեմալ Աթաթյուրք) մինչև Էրդողան Հայոց ցեղասպանության ժխտողականությունը շարունակվում է: Դա պետական ժխտողականություն է, որը դարձել է Թուրքիայի պատմության մաս: «Արմենպրես»-ի հաղորդմամբ՝ Բելգիայի Ներկայացուցիչների պալատի հուլիսի 22-ի լիագումար նիստում Հայոց ցեղասպանության բանաձևի քննարկման ժամանակ նման կարծիք է հայտնել պալատի պատգամավոր, Բնապահպանական կուսակցության անդամ Բենուա Հելինգսը:

Լիագումար նիստը սկսվել է Բելգիայի ժամանակով 14:15-ին, և Հայոց ցեղասպանության բանաձևի քննարկումն օրակարգում ութերորդ հարցն է: Քննարկմանը ելույթ են ունեցել բանաձևի հեղինակ «Ֆլամանդական նոր դաշինքը» (N-VA) կոալիցիոն կուսակցության անդամ, պատգամավոր Փիթեր դե Ռուվերը, Քրիստոնեա-դեմոկրատական Ֆլամանդական կուսակցության անդամ Սառա Քալերհոթը, «Բարեփոխում» շարժման անդամ Դենիս Դյուքարմը:

Դյուքարմը հիշեցրել է, թե Բելգիայի վարչապետը խորհրդարանի ամբիոնից հայտարարել է, որ Բելգիայի կառավարությունը ճանաչում է Հայոց ցեղասպանությունը: «Նրանք բնաջնջվել են միայն նրա համար, որ հայ են եղել»,-ասել է նա: Իսկ Սառա Քալերհոթն ընդգծել է, որ բանաձևի նպատակն է՝ կոչ անել Թուրքիային ակտիվացնել ջանքերը Հայոց ցեղասպանության ճանաչման ուղղությամբ:

Հումանիստական ժողովրդական կենտրոնի անդամ Ժորժ Դալմայնը նշել է , որ երիտթուրքերը կոտորել են քրիստոնյա փոքրամասնություններին՝ Օսմանյան կայսրությունում միատարր թուրքական պետություն ստեղծելու համար:

Սոցիալիստական կուսակցության անդամ Ստեֆան Քրուսնիերն իր հերթին նշել է, որ իր կուսակցությունը միշտ ճանաչել է Հայոց ցեղասպանությունը: