«Շիրակ»-ի գլխավոր մարզիչը պարտությունը չի պայմանավորում առանցքային ֆուտբոլիստների բացակայությամբ

«Շիրակ»-ի գլխավոր մարզիչ Վարդան Բիչախչյանը հուլիսի 23-ին շվեդական ԱԻԿ-ի հետ Գյումրու մարզադաշտում կայացած խաղից հետո հրավիրված մամուլի ասուլիսի ժամանակ անդրադառնալով թիմի պարտությանը՝ նշեց, որ դա սպասելի էր, քանի որ թիմի առանցքային խաղացողները մարզադաշտում չէին: «Խաղի սցենարը պարզ էր, դրսում 2:0 պարտվել էինք և ներսում ոչ միայն պետք է մտածեինք հարձակման մասին, այլ նաև պետք է կարողանայինք անառիկ պահել դարպասը, քանի որ գիտակցում էինք, որ հակառակորդի մեկ գոլի դեպքում արդեն մեր դրությունն էլ ավելի կբարդանա և պետք կլիներ 4 գնդակ հաջորդ փուլ անցնելու համար: Իմ կարծիքով՝ առաջին խաղակեսը վատ չսկսեցինք, կարողացանք հարձակման գծում ագրեսիվ խաղով աչքի ընկնել ու մի քանի գոլային պահեր ստեղծել, սակայն, մեր պաշտպանը տարրական սխալ թույլ տվեց ու հակառակորդին հաջողվեց հաշիվը բացել: Ամեն ինչ չեմ բարդում թիմի հիմնական խաղացողների բացակ այության վրա. այն խաղացողները, ովքեր փոխարինեցին բացակա տղաներին, հուսալի խաղով աչքի ընկան, բայց բացակա տղաները մեր առանցքային խաղացողներն էին: Մի փոքր հիասթապված եմ, չկարողացանք օգտագործել մեր շանսը և կատարել ակումբի նախագահի կողմից մեր առջև դրած առաջադրանքը: Բայց սա սպորտ է և պետք է հետևություններ անելով՝ շարժվենք առաջ: Նման մրցաշարերում յուրաքանչյուր մանրուք կարող է լինի ճակատագրական ու, փաստորեն, 2 խաղերում էլ մենք շատ պատճառներ ունեինք, որպեսզի երկրորդ փուլ չանցնեինք: Բնականաբար, խաղի լարվածությունն էլ դեր խաղաց»,- նշեց Վարդան Բիչախչյանը:

Թիմի գլխավոր մարզիչն անդրադարձավ թիմի առաջիկա ծրագրերին՝ նկատելով, որ թիմը կունենա եռօրյա հանգիստ, որից հետո հուլիսի 27-ին 1 շաբաթ կունենա պատրաստվելու Հայաստանի առաջնությանը: Նա չի բացառում, որ թիմից հեռացողներ կլինեն: «Չեմ կարող բացառել, որ հեռացողներ կլինեն: Ակումբի ղեկավարությունը քայլեր ձեռնարկում է նաև համալրումների հետ կապված, բայց այս պահին հստակ ասել չեմ կարող: Անելիքները կհսատեցվեն առաջիկա 3 օրերի ընթացքում»,- նշեց «Շիրակ»-ի գլխավոր մարզիչը: