Պատվով խաղացինք, շնորհակալ եմ տղաներիս դրա համար. Խաշմանյան

Այսօր մեր հաղթանակը օրինաչափ էր: ԼՈՒՐԵՐ.com-ի թղթակցի փոխանցմամբ, այդ մասին Եվրոպայի լիգայի որակավորման փուլի երկրորդ տուրի՝ «Ալաշկերտ»-«Կայրաթ» պատասխան խաղից հետո, նշեց «Ալաշկերտի» գլխավոր մարզիչ՝ Աբրահամ Խաշմանյանը:

«0:3 հաշվով պարտվելուց հետո շատը կարևոր էր, որ կարողացանք թիմին առավելագույնս պատրաստել խաղին: Փառք Աստծո մենք կարողացանք, թե՛ հոգեբանորեն, թե՛ ֆիզիկապես և թե՛ տակտիկապես թիմին պատրաստել խաղին, ինչը ցույց տվեց հանդիպումը:

Կարծում եմ, այսօր մեր հաղթանակը օրինաչափ էր: «Ալաշկերտի» ցույց տված խաղից գոհ եմ, որովհետև կար բովանդակություն, կային գոլային պահեր և կազմակերպված էինք շատ: Այն, ինչ որ ցանկանում էինք՝ հասանք: Ճիշտ է, չանցանք հաջորդ փուլ, բայց պատվով խաղացինք և դրա համար շնորհակալ եմ տղաներիս»:

Անդրադանռալով բռազիլացի ֆուտբոլիստ Դոս Սանտոսին, մարզիչը նշեց.

«Նա 70%-ով էր պատրաստ: Բայց բարձրակարգ խաղացող է և շատ օգուտ կբերի մեզ: Կարծում եմ, այսօր նա մի անգամ չի սխալվել, ինչը խոսում է ֆուտբոլիստի որակի մասին: Եթե մեր ակումբները նման խաղացողնմեր շատ ունենան, մենք միանաշանակ ավելի լավ ֆուտբոլ կխաղանք»:

Այն հարցին, որ եթե չլիներ առաջին գոլը, հնարավոր էր արդյոք թիմը կարողանար հաջորդ փուլի համար պայքարել մարզիչն ասաց.

«Դժվար հարց է: Ֆուտբոլում ամեն ինչ հնարավոր է: Անփույթ գոլ բաց թողեցինք, նման գոլեր չի կարելի բաց թողնել: Անգամ այդ գոլից հետո կարողացանք, չթուլանալ, այլ հասնել հաղթանակի, ինչը բավականին լավ էր:

Մեր թիմը երկու-երեք տարվա ակումբ է: Եթե հետ նայենք և տեսնենք, թե որտեղ ենք եղել և որտեղ ենք հիմա՝ մրցաշրջանը հաջող պետք է համարենք: Թիմը լավ ոճով մտավ եվրալիգա, ապացուցեց, որ լավ թիմ է և ապագան էլ շատ ավելի լավն է լինելու»:

Կարճ փոխանցումներով արագ ֆուտբոլ խաղալը, արդյո՞ք մարզչի հրահանգ էր, հարցին Խաշմանյանը պատասխանեց.

«Միշտ իմ թիմերին ստիպում եմ արագ ֆուտբոլ խաղալ` նաև Հայաստանի առաջնությունում, որովհետև մեր առաջնությունում դանդաղ ֆուտբոլ է ընթանում և դրսում մենք խնդիրներ ենք ունենում: Ժամանակակից չափանիշները ստիպում են, որ թիմերը արագ խաղան: Դրա համար միշտ պետք է, որ թիմը ֆիզիկապես լավ պատրաստ լինի, ֆունկցիոնալ վիճակում լինի: Մեզ մոտ քայլելով ֆուտբոլը անցնում է, իսկ դրսում՝ ոչ: Պետք է արագ խաղանք: Դրա համար շատ կարևոր է մարզումային գործընթացը»: