Սահմանամերձ Նավուրի առողջության առաջնային պահպանման կենտրոնը կսպասարկի 1970 բնակչի

Հայաստան 27 Հուլիս, 2015 22:22

Նավուր համայնքի առողջության առաջնային պահպանման կենտրոնն այսուհետև կսպասարկի Տավուշի մարզի Նավուր, Չինչին և Իծաքար համայնքների 1970 բնակչի: Ինչպես տեղեկացնում են ՀՀ առողջապահության նախարարությունից, 2014 թվականին ՀՀ առողջապահության նախարարության կողմից ՀՀ կառավարության և Համաշխարհային բանկի ֆինանսավորմամբ իրականացվող ծրագրի շրջանակում կառուցված շենքի բացմանը ներկա են եղել ՀՀ առողջապահության նախարար Արմեն Մուրադյանը և Համաշխարհային բանկի Երևանի գրասենյակի ղեկավար Լորա Բեյլին:

«Անկախության տարիներից ի վեր ենթակառուցվածների մեջ այս ամբուլատորիան առաջին կառույցն է համայնքում, որը շատ դրական ազդեցություն կունենա առողջապահության զարգացման վրա: Շնորհակալ ենք ՀՀ առողջապահության նախարարության ծրագրերի իրականացման գրասեյակին և Համաշխարհային բանկին այս ծրագիրը կյանքի կոչելու համար»,- ասել է Նավուր համայնքի ղեկավար Արամ Նիգոյանը' հայտնելով համայնքի բնակչության գոհունակությունը:

Նավուր համայնքի առողջության առաջնային պահպանման կենտրոնի տնօրեն Գայանե Գևորգյանն ընդգծել է, որ այս բժշկական կազակերպության գործունեությունն էականորեն կնպաստի բժշկական օգնության և սպասարկման բարելավման գործընթացին' հնարավորություն ընձեռելով սահմանամերձ համայնքի բնակչությանն առաջնային բուժօգնություն ստանալ լավ պայմաններում:

Արմեն Մուրադյանը բուժաշխատողներին ներկայացրել է ՀՀ առողջապահության նախարարության 2015թ. ներդրված նոր ծրագրերը' կարևորելով դրանց արդյունավետ իրականացումը: Նախարարը հետաքրքրվել է սոցիալական փաթեթի շահառուների համար ներդրված կանխարգելիչ բժշկական զննության ծրագրի ընթացքով, անդրադարձել է «Հիվանդությունների կանխարգելում և վերահսկում» ծրագրի շրջանակում այս տարվա հունվարից մեկնարկած սկրինինգային ծրագրերին' ընդգծելով բնակչության իրազեկության մակարդակի բարձրացմանն ուղղված աշխատանքների կարևորությունը:

ՀՀ մարզերի առողջապահության համակարգերի արդիականացման արդյունքում, 2014 թվականին Նավուր համայնքն ընդգրկվել է Համաշխարհային բանկի հավելյալ ֆինանասավորման վարկային ծրագրում: Եվ, քանի որ տվյալ տարածքում վերանորոգման աշխատանքներ կատարելը նպատակահարմար չէր, ուստի որոշվեց հատկացված տարածքում կառուցել ամբուլատորիայի նոր շենք, որի շինարարական աշխատանքները սկսվել են 2014 թվականի ապրիլին: Ընդհանուր առմամբ, Նավուր համայնքում ներդրվել է շուրջ 52.5 մլն դրամ: