Օձի խայթոցի դեպքերն այս տարի նվազել են

Օձերի խայթոցների դեպքերն նախորդ տարվա համեմատ ընթացիկ տարում նվազել են: Այս մասին հուլիսի 29-ին լրագրողների հետ հանդիպման ժամանակ ասաց ՀՀ առողջապահության նախարարության գլխավոր թունաբան Միքայել Գաբրիելյանը՝ անդրադառնալով օձի և կարիճի խայթոցի դեպքերին, ինչպես նաև տվեց խորհուրդներ բարդություններից խուսափելու համար: Ներկայացնելով վիճակագրությունը' գլխավոր թունաբանը նշեց, որ ընթացիկ տարում օձի խայթոցից թունավորման 48 դեպք է գրանցվել' ի տարբերություն անցյալ տարվա նույն ժամանակահատվածի 63 դեպքի:

«Արմենպրես»-ի փոխանցմամբ' Միքայել Գաբրիելյանը նշեց, սակայն, որ եթե նախորդ տարի մահացության դեպք չի գրանցվել, այս տարի մեկ մարդ մահացել է օձի խայթոցից:

Մասնագետի տեղեկացմամբ' Հայաստանի ողջ տարածքում օձեր առկա են, սակայն առավել ակտիվ են Արարատյան դաշտավայում, Սյունիքում և հիմնական դեպքերը գրանցվում են Սիսիանում, Կապանում, Գորիսում: «Հայաստանում հիմնականում տարածված են գյուրզա և հայկական իժ թունավոր օձատեսակները»,- ասաց նա' հավելելով, որ մայրաքաղաքում օձերն առավել շատ են Հրազանդի կիրճում:

Գլխավոր թունաբանն օձերից պաշտպանվելու մի խորհուրդ տվեց: «Եթե օձ եք նկատում, ապա մի երկու րոպե անշարժ կանգնեք, և նա կհեռանա, քանի որ օձը նախահարձակ չի լինում»,- ասաց նա: Իսկ երբ արդեն օձը խայթել է, պետք է անշարժացնել մարդուն, չթողնել որ քայլի, անհապաղ տանել հիվանդանոց: «Կարելի է հենց նույն պահին արտածծել թույնը: Թույնը բերանի խոռոչով չի անցնում օրգանիզմ, միայն կվնասի այն դեպքում, եթե կա բաց ու արյունահոսող վերք»,- ավելացրեց նա:

Ինչ վերաբերում է կարիճի խայթոցից առաջացած թունավորումներին, ապա Գաբրիելյանը նկատեց, որ օձերի համեմատ այդ դեպքերն ավելի նվազ են: «Թունավոր է սև կարիճի թույնը, և այս տարի գրանցվել է 4 դեպք' նախորդ տարվա 6 դեպքի փոխարեն»,-ասաց հանրապետության գլխավոր թունաբանը: Նա նաև շեշետեց, որ կարիճի հակաթույնը պահպանման կարճ ժամկետ ունի և այդքան ֆինանսական միջոցներ չկան բոլոր հիվանադանոցներին դրանցով ապահովելու համար: Բարեբախտաբար, մինչ այսօր մահացության դեպքեր չեն եղել: