ՀՀ-ում հարցվածների 95%-ն ընդունելի է համարում էլեկտրաէներգիայի թանկացման դեմ անցկացված ակցիաները

«Gallup Internatiоnal» ասոցիացիայի հայաստանյան ներկայացուցչության կողմից Հայաստանի տարածքում 1106 քաղաքացիների շրջանում իրականացած հարցման արդյուքները վկայում են, որ հարցման ենթարկվածների 95 տոկոսն ընդունելի է համարում էլեկտրաէներգիայի թանկացման դեմ բողոքի ակցիաները, մասնավորապես' Ազատության հրապարակի նստացույցը, այնուհետև Բաղրամյան պողոտայում տեղի ունեցած դեպքերը: «Արմենպրես&ra quo;-ի փոխանցմամբ' միջազգային կազմակերպության հայաստանյան ներկայացուցչության տնօրեն Արամ Նավասարդյանը լրագրողների հետ հանդիպմանը ներկայացնելով իրենց հարցման արդյունքները' նշեց, որ հարցվածների 73 տոկոսը լիովին դրական, իսկ 22 տոկոսն էլ ավելի շուտ դրական է համարել ցուցարարների քայլը:

Չնայած հանգամանքին, որ ցույցի մասին տեղյակ է եղել և էլեկտրաէներգիայի գնի թանկացման իրադարձություններին հետևել է հարցմանը մասնակցածների 95 տոկոսը, «Դուք անձամբ մասնակցում եք ցույցերին» հարցին դրական պատասխան է տվել հարցվածների 15 տոկոսը: Բողոքի ակցիային մասնակցածների 75 տոկոսը նշել է, որ Բաղրամյան պողոտայում է մասնակցել ցույցին, 24 տոկոսը' Ազատության հրապարակում, «ես իմ բողոքը ներկայացրել են ինտերնետի' Ֆեյսբուքի միջոցով»' ասել է 7 տոկոսը, 11 տոկոսն էլ նշել է, որ ցույցին մասնակցել է Գյումրիում:

Պատասխանելով հունիսի 22-ի լույս 23-ի իրադարձություններին, մասնավորապես, ոստիկանության կողմից ջրցան մեքենաներով ցուցարարներին ցրելու դեպքին վերաբերող հարցին' հարցվողների ճնշող մեծամասնությունը նշել է, որ բացասական է վերաբերում այդ փաստին:

Հունիսի 27-ին Հանրապետության նախագահի կողմից արված հայտարարությանը, ըստ որի, պետք է «Հայաստանի էլեկտրական ցանցեր» ընկերությունում անցկացվի աուդիտ, որին ցանկալի է մասնակցեն նաև ցուցարարները, դրական է վերաբերվել հարցվածների 44 տոկոսը, 7-ը' միանշանակ դրական, 37-ը' ավելի շուտ դրական: Նույնքան տոկոսն էլ բացասական, 30-ը' ավելի շուտ բացասական, 14 տոկոսը' ընդհանրապես բացասական: 12 տոկոսն էլ դժվարացել է պատասխանել:

Այն հարցին, թե «Ձեր կարծիքով' բողոքի նման ակցիան, օրինակ, Բաղրամյան պողոտայի փակումը, որ դեպքերի համար է ընդունելի», պատասխանել են' սոցիալական խնդիրների լուծման համար 92 տոկոսը, քաղաքական հարցեր բարձրացնելու համար' 28 տոկոսը (հարցվողներն ունեցել են մեկից ավելի պաստախան տալու հնարավորություն):

ՀԷՑ-ի արդյունավետ գործունեության և կառավարման համար հարցվողների 70 տոկոսը որպես լուծում նշել է ընկերության ազգայնացումը, 12 տոկոսն ասել է' «ՀԷՑ-ը պետք է վաճառվի այլ ընկերության», 11 տոկոսն էլ' «Պետք է ՀԷՑ-ը թողնել Ինտեր ՌԱՈ-ին' պարտադրելով փոխել ղեկավարներին' բարձրացնելով կառավարման արդյունավետությունը», 8 տոկոսն էլ դժվարացել է պատասխանել նշված հարցին: