Նախարար Մուրադյանը հետևել է Բյուրականում ամբուլատորիայի շինարարությանը

Օգոստոսի սկզբին մեկնարկել են ՀՀ Արագածոտնի մարզի Բյուրական համայնքի նոր բժշկական ամբուլատորիայի կառուցման աշխատանքները: ՀՀ առողջապահության նախարար Արմեն Մուրադյանի օգոստոսի 22-ին շինհրապարակ կատարած այցի ընթացքում ՀՀ ԱՆ «Առողջապահական ծրագրերի իրականացման գրասենյակ» պետական հիմնարկի տնօրեն Նելսոն Զուլոյանը և մարզի առողջապահության պատասխանատուները նախարարին ներկայացրել են կատարված աշխատանքների ծավալները:

Արմեն Մուրադյանը շինարարների հետ զրույցում կարևորել է իրականացվող աշխատանքների որակի և ժամկետների պատշաճ ապահովումը: Նախարարը նշել է, որ ամբուլատորիայի գործունեությունը էականորեն կնպաստի բժշկական օգնության և սպասարկման բարելավման գործընթացին' հնարավորություն ընձեռելով նաև այլ համայնքների բնակչությանն առաջնային բուժօգնություն ստանալ ժամանակակից չափանիշներին համապատասխան պայմաններում: Քննարկվել է նաև հետագայում ամբուլատորիան նոր գույքով և բժշկական սարքավորումներով վերազինելու անհրաժեշտությունը:

Արմեն Մուրադյանը հետաքրքրվել է սոցիալական փաթեթի շահառուների համար ներդրված կանխարգելիչ բժշկական զննության, ինչպես նաև նաև Իմունականխարգելման ազգային ծրագրերի ընթացքով, անդրադարձել «Հիվանդությունների կանխարգելում և վերահսկում» ծրագրի շրջանակում այս տարվա հունվարից մեկնարկած սկրինինգային ծրագրերին:

Ներկա պահին Բյուրականի ամբուլատորիան իր գործունեությունն է ծավալում անմխիթար պայմաններում գտնվող, 1950թ. կառուցված շենքում, որը մասնակի վերանորոգվել է 2000թ.: Ամբուլատորիայում աշխատում են ընտանեկան բժշկության վերապատրատում անցած 3 բժիշկ և 2 բուժքույր: Այն սպասարկում է Բյուրական համայնքի 5180 բնակիչների' (Բյուրական, Անտառուտ և Օրգով գյուղեր):

Շինարարությունն իրականացվում է ՀՀ առողջապահության նախարարության կողմից' ՀՀ կառավարության և Համաշխարհային բանկի ֆինանսավորմամբ իրականացվող վարկային ծրագրերի շրջանակում 2014թ. ընթացքում տնտեսված միջոցներով: Շինարարության ավարտը նախատեսված է 2015թ. դեկտեմբերի վերջին: