Սահմանադրության նոր նախագիծն 95 տոկոսով համապատասխանում է ՀՅԴ-ի պատկերացումներին

Հայ հեղափոխական դաշնակցությունը Սահմանադրության նոր նախագծի առնչությամբ ոչ թե լռություն է պահպանել, այլ փորձել հասկանալ նախագիծը, վերլուծել եւ առաջարկներ ներկայացնել: ՀՅԴ խմբակցության պատգամավոր Աղվան Վարդանյանը շեշտում է, որ կուսակցությունը մեծ թիմով ուսումնասիրել է նախագիծը, առանձին հանդիպումներ ունեցել երկրի նախագահի, մասնագիտական խմբի անդամների, իրավաբանների հետ: «Դաշնակցությունը բազմաթիվ առաջարկությ ուններ է ներկայացրել, եւ այսօր կարող ենք ասել, որ Սահմանադրության նոր նախագիծն 90-95 տոկոսով համապատասխանում է կուսակցության պատկերացումներին»,- ասաց Աղվան Վարդանյանը՝ ավելացնելով, որ նոր Սահմանադրության նախագիծը լուծելու է երկրի խնդիրները:

Պատգամավորի գնահատմամբ' Սահմանադրության նոր նախագիծը պարունակում է երեք հիմնական շեշտադրումներ, որոնք ապահովելու են երկրի զարգացումը:

«Անցում դեպի կառավարման խորհրդարանական համակարգին, անցում 100 տոկոս համամասնական ընտրական համակարգին և այնպիսի համակարգի ստեղծում, որտեղ ընդդիմությունը կունենա իրական լծակներ՝ ազդելու իշխանության վրա: Այս երեք հիմնական սկզբունքները արտացոլված են Սահմանադրության տեքստում և կարող ենք արձանագրել, որ իբրև քաղաքական մտածողություն, քաղաքական ուժ, մեր մոտեցումները հաղթանակել են: Չլինելով իշխանության մեջ և ունենալով խորհրդարանում հինգ պատգամավոր' հասանք նրան, որ երկիրը գնալու է այն ուղղությամբ, որը մենք պատկերացրել ենք: Որևէ ու ժի համար նման հաղթանակ դժվար իրագործելի էր»,-ասաց նա:

Սակայն այսքանով Դաշնակցության մասնակցությունը Սահմանադրության նոր նախագծի ձեւավորման հարցում չի ավարտվելու: Դաշնակցությունն ունի ավելի քան 20 առաջարկություններ, որոնք հնչեցնելու է Խորհրդարանում նախագծի քննարկման ժամանակ: