Փորձագետն առաջարկում է արևային էներգիայի կիրառմամբ պայքարել ջերմոցային էֆեկտի դեմ

Հայաստանում էներգիայի խնդիրների լուծման հիմնական ճանապարհը ավանդական էներգիայի աղբյուրները վերականգնվող էներգիայի աղբյուրներով փոխարինելն է:

Ինչպես հաղորդում է «Արմենպրես»-ը, օգոստոսի 24-ին լրագրողների հետ հանդիպմանը նման կարծիք հայտնեց «Հելիո տեխնիկա» լաբորատորիայի ղեկավար, դոկտոր, պրոֆեսոր Ժոզեֆ Փանոսյանը:

Փանոսյանը վերականգնվող էներգիայի տեսակներից առանձնացրեց 3-ը' արևային էներգիա, երկրաջերմային և ատոմային: «Այս 3 անկախ էներգիաների աղբյուրներն ունենք և դրանք կարող ենք օգտագործել, որպեսզի եղանակային փոփոխություններն այդքան վատ չազդեն մեր երկրի տնտեսության և մեզ վրա: Մեր ավանդական էներգիայի աղբյույրները, որոնք հիմնականում ընդերքից հանված վառելանյութերն են սպառվելու են, բացի այդ դրանց արդյունահանումն ու կիրառումը շատ վտանգավոր է բնության համար: Մեր բնությունը հիմա դրանից տուժում է, առաջացել է ջերմոցային էֆեկտ, ջերմաստիճանի բարձրացում, ինչի հետևանքով սառույցները հալվում են»,- նշեց Փանոսյանը' հավելելով, որ այդ գործընթացները դեռ կշարունակվեն, քանի դեռ դրանք դադարեցվելու քայլեր չեն արվում:

Նա ասաց նաև, որ Հայաստանի պետական ճարտարագիտական համալսարանում «Հելիո տեխնիկա» լաբորատորիայում արդեն 25 տարի է իրենք զբաղվում են արևային էներգիայի օգտագործման բոլոր հնարավոր հարցերով: Երկրագնդին, արևային էներգիայի 165,000 տերավատտից, պետք է ընդամենը 20 տերավատտ էներգիա, և եթե այդ էներգիայի մի փոքր մասը մենք կարողանանք արդյունավետ օգտագործել, այդ դեպքում կլուծվեն էներգետիկ ու շրջակա միջավայրի հետ կապված բազմաթիվ հարցեր:

«Մենք մեր լաբորատորիայում պատրաստում ենք արևային մարտկոցներ, որոնք արևի էներգիան վերածում են էլեկտրական էներգիայի: Այդ մարտկոցներից մեկը դրվել է Ամերիկյան համալսարանի տանիքին, էներգասնուցման որոշ սարքերի հովացման համար, դրվել են նաև Սուրբ Սարգիս եկեղեցու տանիքին, «Հայաստան» կինոթատրոնի տանիքին և էլի շատ տեղերում:

Դա արվել է նրա համար, որպեսզի ցույց տանք, որ սա լավագույն միջոցն է էներգիա արտադրելու և առանց մեծ տարածքներ գրավելու կարելի է ստանալ էներգիա որը բավարարի մի ամբողջ շենքի բնակչության»,- ասաց բանախոսը:

Արևային էներգիայի փոխարկման համակարգերի մեջ օգտագործվում են ոսպնյակներ կամ հայելիներ, կենտրոնացնելու համար լույսի մեծ տարածք փոքր հեծանի վրա:

Արևային էլեկտրակայններն առաջին անգամ ստեղծվել են 1980-ական թվականներին։ Առաջին արևային էլեկտրակայանը տեղադրվել է Կալիֆոռնիայում: Այսօր արևային էներգիայի արտադրության ոլորտում աշխարհի առաջատար երկրներն են ԱՄՆ, Իսպանիան, Չինաստանը,Գերմանիան, Իտալիան և Հնդկաստանը: Աշխարհի ամենահզոր ա րևային էլեկտրակայանը գտնվում է Հնդկաստանում. այն Չարանկա Սոլար Փարկն է, հզորությունը կազմում է 214 մեգավատտ: