Գեներալ Մանվել Գրիգորյանի ցավակցական խոսքը` ողբերգական վթարից զոհված Գարիկ Արմենակյանի և Հենրիկ Լևոնյանի մահվան կապակցությամբ

Եռասերունդ երկրապահ կամավորականների միության, Հանրապետության բոլոր երկրապահների, հինգերորդ բրիգադի մարտիկների, պատանի, երիտասարդ երկրապահների եւ իմ անունից խոր կսկիծ եւ ցավակցություն եմ հայտնում օգոստոսի 22-ին տեղի ունեցած ողբերգական պատահարի կապակցությամբ, որին զոհ գնացին հայ ազգի երկրապահ զավակներ` մեր սիրելի օպերատոր, մեր հարազատ Գարիկ Արմենակյանն ու մեր լավ ընկեր Հենդոն` Հնձար Լեւոնյանը:

Կորուստն անդառնալի է, վիշտն անամոք: Եռասերունդ երկրապահական ընտանիքի անունից ցավակցում եմ Արմենակյանների եւ Լեւոնյանների ընտանիքներին, հարազատներին, ընկերներին: Ինքներս էլ, սակայն, այս օրերին բազում ցավակցություններ ենք ընդունում: Կատարվածի վերաբերյալ վշտակցություն են հայտնում Արցախյան ուխտագնացության հարյուրավոր մասնակիցները' երկրապահներ Հանրապետության բոլոր տարածքներից, վշտակցություն են հայտնում Արցախի բոլոր վարչական շրջանների բնակչությունն ու ղեկավարները:

Հիրավի, կորուստը նաեւ երկրապահական ընտանիքինն է: Գարիկ Արմենակյանը, որ երկրապահությունը եւ մասնագիտական հմտությունները ժառանգել էր հորից, ամբողջ գիտակցական կյանքի ընթացքում մասնակցել է ԵԿՄ ձեռնարկներին, վավերագրել է բազում երկրապահական միջոցառումներ, ակցիաներ: Գարիկի կատարած աշխատանքը հարստացրել է ԵԿՄ արխիվը, այդ տեսա եւ լուսանկարահանումների հիման վրա պատրաստվել են եւ դեռ պատրաստվելու են ֆիլմեր, տեսանյութեր, տպագիր մամուլի հրապարակումներ: Պատահական չէ, որ այս երկու օրվա ընթացքում նաեւ Գարիկի գործընկերներից ենք ցավակցություններ ստանում:

Գարիկը նաեւ հայոց բանակի սպա էր' մայոր եւ ազնվորեն հայրենիքին էր ծառայում «Հայզինվոր» թերթում:

Հենրիկ Լեւոնյանի ապրած կյանքը եւս երկրապահական էր: Նա լուրջ մասնակցություն ուներ ԵԿՄ տպագիր հրատարակչությունների կայացմանը: Առանց մեր Հենդոյի մասնակցության, առանց նրա ջանքերի չէր անցնում եւ ոչ մի երկրապահական միջոցառում: Նա սրտացավ ու հոգատար հայ մարդ էր' երկրապահ:

Եվս անգամ ցավակցություն հայտնելով անդառնալի կորստյան առիթով' նաեւ առողջություն եմ մաղթում պատահարից տուժած Աննա Թովմասյանին, ով եւվս երկրապահ է, լավ մարդ, լավ երկրապահ, լավ հայ, լավ մասնագետ եւ դեռ լուրջ անելիքներ ունի: Ես վստահ եմ' նա դեռ պիտանի է լինելու մեր ազգին, մեր պետությանը: Առողջություն նաեւ օպերատոր Լիպարիտ Ասատրյանին, ով բարեբախտաբար, ծանր վնասվածքներ չի ստացել պատահարի արդյունքում:

ԵԿՄ վարչության նախագահ,

Արցախի հերոս,

Զորավար Մանվել Գրիգորյան