«Մոդեռնից-պոստմոդեռն» ցուցահանդեսն անտարբեր չթողեց այցելուներին

Երվանդ Քոչարի, Լևոն Թութունջյանի, Սալվադոր Դալիի, Մինաս Ավետիսյանի և մի շարք ժամանակակից արվեստագետների ստեղծագործություններն ամփոփվեցին յուրօրինակ ցուցահանդեսում: «Բարձր արվեստ» կերպարվեստի կենտրոնը Կոմիտասի թանգարան-ինստիտուտի և ՀՀ մշակույթի նախարարության հետ համագործակցության արդյունքում հանրության դատին հանձնեց «Մոդեռնից-պոստմոդեռն» խորագրով ցուցահանդեսը:

«Ինձ շատ դուր է գալիս, որ Կոմիտասի թանգարան-ինստիտուտում ներդրվել է ավանդույթ' ներկայացնել տարբեր թեմաների ներքո արվեստագետների գործերը: Մենք հասկանում ենք, որ ընտրությունը շատ խիստ ձևով է կատարվում, որովհետև Կոմիտասի խստապահանջ հայացքը մեզ հետապնդում է: Կարծում եմ, որ շատ խորհրդանշական է, որ բացառապես մասնավոր հավաքածուների աշխատանքներ են ներկայացված»,- «Արմենպրես»-ի փոխանցմամբ'ցուցահանդեսի ընթացքում լրագրողների հետ զրույցում նշեց ՀՀ մշակույթի նախարար Հասմիկ Պողոսյանը:

Նախարարն ընդգծեց, որ ցուցահանդեսին ներկայացված գործերը ժամանակին չէին գտնում իրենց լսարանը, որովհետև երբեմն արգելված էին: Հասմիկ Պողոսյանը շեշտեց, որ հայ ժամանակակից արվեստը շատ մեծ հեռանկարներ ունի, և փաստի ապացույցը Վենետիկի այս տարվա բիենալեն էր:
«Այս ոճը ժամանակի մեջ ես սկսում ընկալել: Իմ բոլոր գործուղումների ժամանակ փորձում եմ այցելել ժամանակակից արվեստի թանգարաններ և տեսնել, թե ինչ զարգացումներ կան այլ երկրներում: Մեր արվեստագետները ևս գտնվում են ճիշտ տեղում և բարձր մակարդակի վրա»,-հավելեց մշակույթի նախարարը:

Իրադարձության մասնակիցները, ինչպես և նախարարը, տպավորված էին ներկայացված նմուշներով:

Ցուցահանդեսին ներկայացված են այնպիսի հեղինակների աշխատանքներ, ինչպիսիք են Երվանդ Քոչարը, Լևոն Թութունջյանը, Սալվադոր Դալին, Մինաս Ավետիսյանը, ժամանակակիցներից Արա Ալեքյանը, Համլետ Հովսեփյանը, Խաչատուր Մարտիրոսյանը, Աշոտ Հարությունյանը, Ներսես Մելիքյանը, Նարեկ Ավետիսյանը, Մերի Մունը, Գարիկ Կարապետյանը, Արման Համբարձումյանը, Հարություն Զուլումյանը, Նարինե Զոլյանը: Էքսպոզիցիան բաժանված է 8 թեմաների. «Սկիզբ»՝ Երվանդ Քոչար, Լևոն Թութունջյան, Սալվադոր Դալի, «Ներկան»' Խաչատուր Մարտիրոսյան, Գարիկ Կարապետյան, Արա Հայթայան, Աշոտ Հարությունյան, «Մեր հողը»՝ Համլետ Հովսեփյան, «Քաղաք»՝ Մերի Մուն, «Չսերտած դասեր»՝ Հարություն Զուլումյան, Նարինե Զոլյան, «Ադամը դրախտից»՝ Արա Ալեքյան, Ներսես Մելիքյան, «Եվաներ»՝ Թառլոյան եղբայրներ, «Մինասի աթոռը»' Մինաս Ավետիսյան, Նարեկ Ավետիսյան և Արման Համբարձումյան:

Ցուցահանդեսը հասանելի կլինի մինչև հոկտեմբերի 24-ը: