Խաչվերացը հայտարարվել է որպես Վանաձորի օրհնության օր

Սուրբ Խաչի տոնը Գուգարաց թեմի առաջնորդ Տեր Սեպուհ արքեպիսկոպոս Չուլջյանի օրհնությամբ հայտարարվել է որպես Վանաձոր քաղաքի օրհնության օր: Ինչպես «Արմենպրես»-ին տեղեկացրին Գուգարաց թեմի մամլո դիվանից, հայ իրականության մեջ քաղաքները չունեն հատուկ օրհնության օր և Վանաձոր քաղաքն այս առումով բացառիկ է: Խաչվերացի տոնին քաղաքի օրհնության օրվա հաստատումը ոչ միայն Սուրբ Խաչի խորհրդի պանծացումն է, այլև հնարավորություն է քաղաքի բնակիչներին' տարին գոնե մեկ անգամ ի մի գալու ի հոգևորս և Սուրբ Խաչի զորությունը հայցելու քաղաքի բնակչության հոգևոր անվտանգության, պահպանման և միասնության համար:

Տոնի առավոտյան Սուրբ Պատարագ է մատուցվել թեմի բոլոր գործող եկեղեցիներում, Վանաձորի առաջնորդանիստ Սուրբ Գրիգոր Նարեկացի եկեղեցում, հանդիսապետությամբ բարձրաշնորհ Տեր Սեպուհ արքեպիսկոպոս Չուլջյանի, Սուրբ Պատարագ մատուցվեց ձեռամբ եկեղեցու հոգևոր հովիվ Տեր Վահան քահանա Ազարյանի: Տոնին նվիրված բուն արարողությունները սակայն սկսվել են երեկոյան: Թեմի բոլոր այն ծուխերում, որտեղ կան հոգևոր հովիվներ և գործող եկեղեցասեր երիտասարդաց միություններ, կազմակերպվել են խաչերթեր: Վանաձորում խաչերթը խաչերով, խաչվառով, հոգևորականի առաջնորդությամբ և մասնակցությամբ քաղաքապետ Սամվել Դարբինյանի, փոխքաղաքապետ Նորիկ Սարդարյանի և քաղաքապետարանի աշխատակազմի' «Համախմբվենք հանուն մեր քաղաքի հոգևոր անվտանգության…» կարգախոսներով սկիզբ է առել Հայքի հրապարակից դեպի առաջնորդանիստ եկեղեցի, ուր խաչերթի մասնակիցները ստացան թեմակալ առաջնորդ Սեպուհ Սրբազանի օրհնությունը: Խաչերթին և դրան հետևող եկեղեցական արարողություններին իրենց մասնակցությունն են բերել քաղաքի բարձրագույն ուսումնական հաստատությունները, դպրոցները, հասարակական կառույցները և ուխտավորներ:

Եկեղեցում, հավարտ երեկոյան ժամերգության, Սրբազան Հոր առաջնորդությամբ' կազմվեց խաչի թափոր, իրականացվեց անդաստանի կարգ, որով թափորապետն օրհնել է աշխարհի չորս ծագերը և Վանաձոր քաղաքը' բարեկարգություն և խաղաղություն հայցելով Աստծուց:

Այսուհետ ամեն տարի՝ Խաչվերցին Վանաձորը կտոնի իր օրհնության օրը, իսկ քաղաքի պահապանը կլինի Սուրբ Խաչը: