Ադրբեջանում «սպառնում» են Եվրախորհրդարանին

Ադրբեջանում սկսել են «սպառնալ» Եվրախորհրդարանին' սեպտեմբերի 10-ի նիստում Ադրբեջանում մարդու իրավունքների խախտումների հետ կապված պատժամիջոցների կոչով բանաձեւ ընդունելու համար:

Ինչպես հաղորդում է «Արմենպրես»-ը, վկայակոչելով «Թուրան»-ը, Եվրոպայի Խորհրդի խորհրդարանական վեահաժողովում Ադրբեջանի պատվիրակության ղեկավար Սամեդ Սեիդովը հանդես է եկել ԵԽԽՎ «Եվրանեստ»-ում («Արեւելյան գործընկերություն» ծրագրի մեջ մտնող երկրներ' Հայաստան, Ադրբեջան, Վրաստան, Բելառուս, Մոլդովա, Ուկրաինա) ադրբեջանական պատվիրակության գործունեությունը «սառեցնելու» առաջարկությամբ:

Իր առաջարկությունը Սեիդովը հիմնավորել է ծիծաղելի անհրաժեշտությամբ' «Եվրախորհրդարանի շարքերում կոռուպցիայի բացահայտումով»: Այս մասին, Սեիդովը հայտարարել է ադրբեջանական Միլի Մեջլիսում, որն այսօր հավաքվել է Եվրախորհրդարանի ընդունած բանաձեւին պատասխանելու համար:

Հետո Սեիդովը Եվրախորհրդարանին, մասնավորապես' «Ազատ Եվրոպա» դաշինքի պատգամավորներին «մեղադրել» է Լեռնային Ղարաբաղի Հանրապետության հետ համագործակցության մեջ:

Ադրբեջանի խորհրդարանի խոսնակ Օքթայ Ասադովն էլ կառույցի արտահերթ նիստում հայտարարել է, որ միջազգային կազմակերպություների հետ Ադրբեջանի համագործակցությունը պետք է վերանայվի:

«Գտնում եմ, որ անհրաժեշտ է դիմել Ադրբեջանի կառավարություն «Արեւելյան գործընկերություն» ծրագիրը վերանայելու համար», -ասել է նա:

Ադրբեջանի Միլի Մեջլիսի արտահերթ նիստը հրավիրվել է հատուկ, որպեսզի պատսխան տրվի Եվրախորհրդարանի սեպտեմբերի 10-ի բանաձեւին: Այդ բանաձեւում քաղբանտարկյալներին ազատ արձակելու պահանջ է արտահայտվել, ինչպես նաեւ կոչ է արվել պատժամիջոցներ կիրառել բոլոր այն պաշտոնատար անձանց եւ դատավորների դեմ, որոնք հետապնդել են քաղաքական ակտվիստներին Ադրբեջանում:

Միջազգային եւ ադրբեջանական ԶԼՄ-ների համաձայն' ներկայում Ադրբեջանում մոտ 100 քաղաքական բանմտարկյալներ կան, այդ թվում' 20 «խղճի բանտարկյալ»: