«Երգում ենք Կոմիտաս» փառատոնի համերգին մասնակցել են տարբեր երկրներից ժամանած կոլեկտիվներ

ՀՀ սփյուռքի նախարարության Համահայկական մշակութային փառատոնի շրջանակում սեպտեմբերի 25-ին Կոմիտասի անվան կամերային երաժշտության տանն անցկացվել է Հայոց ցեղասպանության 100-րդ տարելիցին նվիրված «Երգում ենք Կոմիտաս» փառատոնի գալա-համերգը, որին մասնակցել են Հայաստանից, Արցախից և աշխարհի 12 երկրից ժամանած երգչախմբեր, պարախմբեր և անհատ կատարողներ: Ինչպես տեղեկացնում են ՀՀ սփյուռքի նախարարության մամուլի եւ հասարակայնության հետ կապերի վարչությունից, «Հայրապետական մաղթանք» երգով փառատոնը բացել է Ստամբուլի «Լուսա­վորիչ» երգչախում­բը՝ գեղարվես­տական ղեկավար Հակոբ Մամի­կոն­յանի խմբավարությամբ: Հնչել են Կոմիտասի ստեղծագործությունները հայ և օտարազգի երաժիշտների կատարմամբ:

Մեներգերով հանդես են եկել Ֆրանկֆուրտից Սոնա Տալյանը ՝ «Յոթ երգ դաշնա­մու­­րի համար», Էստոնիայից Տամարա Բեզլուդովան՝ «Երկինքն ամպել ա», Արցախից' Հակոբ Բաբայանը՝ «Երգաշար», Դոնի Ռոստովից' Տաթևիկ Գևորգյանը «Կռունկ» կատարումներով: Կոմիտասի անզուգական «Անտունին» կա­տա­րեց լիբանանահայ Շողիկ Թորոսյանը: «Սաթ» տրիոյի կատարմամբ հնչել է «Խորհուրդ խորին» ստեղծագործությունը: «Շողեր ջան»-ի կատարմամբ ելույթ է ունեցել «Վասպուրիկ» մարիոնետների թատրոնը: «Արմավիր» պարախումբը ներկայա ցրել է «Ալ այլուխս» ստեղծագործությունը:

Փառատոնի մասնակից, ազգությամբ թուրք, Գերմանիայի Համբուրգ քաղաքից ժամանած Լեման Շթեյնը կատարել է յուրաքանչյուր հայի զգացումային աշխարհի հիմնը՝ «Դլե յաման»-ը:

Վիրահայոց թեմի Բաթումիի Ալեքսանդր Մանթաշովի անվան կրթամշակու­թային և երիտասարդական կենտ­րոնի «Աղբյուր» երգչախմբի կատար­մամբ հնչել է «Հով արեք, սարեր ջան» ստեղծագործությունը:

«Ալագյազ, էս առուն» երգի կատարումով հանդես է եկել Արարատյան Հայրապետական Թեմի «Ծաղկա­զարդ» համախումբը, «Խումար պարկե» ստեղծագործությունը հնչեցրել է Վլադի­կավ­կազի «Սուրբ Գրիգոր Լուսավորիչ» երգչախումբը, «Իմ չինարի յարը» կատարել է Վիրահայոց թեմի «Հայարտուն» մշակույթի կենտրոնի «Ներսես Շնորհալի» երգչախումբը, իսկ Ամմանի Մարզական միության «Երևան» երգչախումբը հանդես է եկել «Մարալ-մարալ» երգի կատարմամբ: Ռուսաստանի Դաշնության Ռոստովի մարզ ի Մյասնիկյանի շրջանի Չալթիր հայաբնակ գյուղից փառատոնին իր մասնակցությունն է բերել «Զանգեր» երգչախու­մբը, որի կատարմամբ հնչել է «Սոնա յար»-ը:

«Յա՛ր ջան, արի», «Ա՛յ սիրուն կաքավ», «Աղջի՛ Մարան» ստեղծագործություններն էլ ներկայացրել է Շահե Քեշիշյանի ղեկավարած հայ-սիրիական «Ովսաննա» երգչա­խումբը:

Աթենքից կիթառահար Հակոբ Քոլանյանը ներկայացրել է Կոմիտասի «Մարա­լի», «Ունաբի» և «Վասպուրական» ստեղծագործությունները: «Գարուն ա» ստեղծագործությունը հնչել Շվեդիայից Կարինե Հելման-Գևորգյանի կատարմամբ, ում շնորհիվ շվեդ երգիչ-երգչուհիները հաճախ իրենց երգացանկում ներառում են նաև Կոմիտասի ստեղծագործությունները: Շվեդ երգչուհի Վիլունդ Անն-Քրիստինեն երգել է «Կանչե կռունկ»-ը: Հաճելի ավանդույթ է դարձել արդեն ճապոնացիների մասնակցությունը կոմիտասյան փառատոներին: Կարեն Իսրայելյանի և ճապոնուհի տավղահար Ու լալա Իոունեի կատարմամբ հնչել են «Ծիրանի ծառ» և «Քելեր, ցոլեր» գործերը: Համերգը եզրափակվել է Գառնիի վոկալ կվինտետի ելույթով:

Համերգի ավարտին Համահայկական մշակութային փառատոնի մասնակիցներին ՀՀ սփյուռքի նախարար Հրանուշ Հակոբյանի անունից ողջունել և շնորհակալություն է հայտնել փոխնախարար Սերժ Սրապիոնյանը: Նա կարևորել է Կոմիտասին նվիրված փառատոների շարունակականությունը՝ նշելով, որ Կոմիտասին նվիրված փառատոնն իրականացվում է երկրորդ անգամ:

«Պատահական չէ, որ մեր միջոցառումները կրում են Մեծն Կոմիտասի անունը: Պատահական չէ նաև, որ այս փառատոնը կրում է «Երգում ենք Կոմիտաս» խորագիրը: 100 տարի առաջ թուրքը փորձեց լռեցնել Մեծն Երգահանին, դրանով իսկ՝ նաև հայի հոգու կանչը, բայց վրիպեց: Այսօր մենք երգում ենք Կոմիտաս, ասել է թե' Կոմիտասը վերադարձել է, և իր հոգեպարար մեղեդիներով գրավում է մարդկանց սրտերը, աշխարհը: Նրա երգն է վերջ տալու մարդու դեմ իրականացված և շարունակվող ոճիրներին՝ ցեղասպանություններին: Կոմիտասյան արվեստը աշխարհասփյուռ հայության միասնության, ազգային ինքնության պահպանման ուղին է, որը ստեղծագործական նոր բացահայտումների ճանապարհ է բացում թե՛ մեզ, թե՛ օտարազգի արվեստագետների համար: Եվ ինչպես ասում էր Պլուզ Երզնկացին. Արվեստի սկիզբը սքանչացումն է»: Այսօր մենք սքանչացանք կոմիտասյան մեղեդիներով: Շնորհակալություն ձեզ»,- ասել է ՀՀ սփյուռքի փոխնախարարը: Սերժ Սրապիոնյանը փառատոնի մասնակցության հավաստագրեր է հանձնել պոլսահայ երգահան Մաժակ Թոշիկյանին, Պոլսի «Լուսավորիչ երգչախմբի գեղարվեստական ղեկավար Հակոբ Մամիկոնյանին և Արմավիրի «Արմավիր» պարախմբին: