Շառլ Ազնավուրի երևանյան համերգի սահմանափակ թվով տոմսեր են վաճառվելու

Ֆրանսահայ լեգենդար երգիչ Շառլ Ազնավուրի երևանյան համերգը մեծ նվեր է Հայաստանին: «Արմենպրես»-ի հետ զրույցում «Երևանյան հեռանկարներ» միջազգային երաժշտական փառատոնի տնօրեն Սոնա Հովհաննիսյանը տեղեկացրեց, որ համերգի առթիվ վաճառվելու են սահմանափակ թվով տոմսեր:

«Ազնավուրի այս անգամվա այցն իրականացվում է Ֆրանկոֆոնիայի 31-րդ նախարարական համաժողովի կապակցությամբ: Այն արարողակարգային մասով կազմակերպվում է Արտաքին գործերի նախարարության կողմից, իսկ «Երևանյան հեռանկարներ» փառատոնին նախարությունը հանձնարարել է կազմակերպել Ազնավուրի երևանյան համերգը»,- նշեց Սոնա Հովհաննիսյանը:

Նրա խոսքով'վերջին տարիներին հենց «Երևանյան հեռանկարներ»-ին է վստահվել է Ֆրանկոֆոնիայի կարևորագույն միջոցառումների համերգային մասի կազմակերպումը:

«Մենք Լարա Ֆաբիանի, իսկ անցյալ տարի՝ Պատրիսիա Կաասի համերգն ենք կազմակերպել՝ դարձյալ այս միջոցառման շրջանակներում: Ազնավուրը մեծագույն հայ է, այս համերգը նա նվիրում է Հայաստանին: Շատ մեծ համաժողով է լինելու, բազմաթիվ երկրների նախարարներ, հյուրեր են ներկա լինելու: Տոմսերի վաճառքը կսկսվի սեպտեմբերի 30-ից: Իրականում վաճառքի դրվող տոմսերի քանակը սահմանափակ է, որովհետև համաժողովի պատճառով մոտ հազար տեղ ընդհանրապես չի վաճառվելու»,- հավելեց Սոնա Հավհաննիսյանը:

Շառլ Ազնավուրի երևանյան համերգը տեղի կունենա հոկտեմբերի 10-ին Կարեն Դեմիրճյանի անվան մարզահամերգային համալիրում:

Նշանավոր ֆրանսահայ շանսոնյե, երգիչ, երգահան, կինոդերասան և հասարակական գործիչ Շառլ Ազնավուրը ծնվել է 1924 թվականի մայիսի 22-ին Փարիզում: Բազմաթիվ հայտնի գործերի հեղինակ և կատարող է: Վաճառվել է Ազնավուրի ստեղծագործություններն ամփոփող շուրջ 100 միլիոն ձայնապնակ: 2009 թվականից Ազնավուրը Շվեյցարիայում Հայաստանի դեսպանն է, ինչպես նաև Ժնևի ՄԱԿ-ի գրասենյակում և այլ միջազգային կազմակերպություններում Հայաստանի մշտական ներկայացուցիչը: