«Հայկական Ժամանակ». Անչափահասին առեւանգել են եւ 6 օր պատանդ պահել

Վերջին լուրեր 9 Հոկտեմբեր, 2011 10:19

«Հայկական Ժամանակ» թերթը գրում է` ''Օրերս Երեւանում մի զարհուրելի հանցագործություն է տեղի ունեցել: Սեպտեմբերի 24-ին, հենց Երեւանի կենտրոնից` Ազատության հրապարակից, երեք երիտասարդներ խաբեությամբ առեւանգել են հրապարակում զբոսնող 17-ամյա մի աղջկա, 6 օր պատանդ պահել եւ սեռական բռնության ենթարկել նրան:

Տեղի ունեցածի հետ կապված ոստիկանությունը մինչ օրս գործ չի հարուցել:

Հասկանալի պատճառներով անչափահաս աղջկա անձնական տվյալները չենք հրապարակում: Պայմանականորեն այդ աղջկան անվանենք Աննա: Աննան երկկողմանի ծնողազուրկ է, 2006թ. ապրել է Հայաստանի մանկատներից մեկում, պարբերաբար ապրել է նաեւ հորաքրոջ տանը: Սեպտեմբերի 22-ին մանկատանը աղջկա եւ իր ընկերների միջեւ մեծ վեճ է եղել, քանի որ նրան կասկածել են ինչ-որ գումարի անհետացման մեջ: Հորաքրոջը` Կիմա Հակոբյանին ավելի ուշ Աննան պատմել է, որ մանկատան իր ընկերները իրեն ծեծի են ենթարկել ու ստիպել, որ ընդունի, թե գումարը ինքն է վերցրել ու ծախսել: Վեճից ու ծեծկռտուքից հետո Աննան դուրս է եկել մանկատնից, իբր դպրոց գնալու պատրվակով, սակայն այլեւս չվերադառնալու մտքով: Ավելի ուշ նա հորաքրոջը պատմել է, որ ցանկացել է ինքնասպան լինել, եւ այդ մասին մտածելով երկու օր շրջել է Ազատության հրապարակում: Իսկ սեպտեմբերի 24-ին նրան են մոտեցել երեք երիտասարդներ:

Նրանք նախ զրուցել են, այնուհետեւ ասել են, որ ցանկանում են աղջկան օգնել ու աշխատանք են առաջարկել: «Միամիտ երեխային խաբելով՝ նստեցրել են մեքենան եւ տարել են Քանաքեռ-Զեյթունում` Ալմաստ գործարանի մոտ գտնվող խոնավ, կիսաքանդված մի տուն ու մի քանի օր նրան այնտեղ են պահել»,- երեկ մեզ պատմեց Կիմա Հակոբյանը եւ ավելացրեց, որ զարմուհու անհետացման մասին իմացել է մանկատան դաստիարակներից մեկի զանգից. «Ինձ զանգահարեցին ու հարցրին, թե արդյոք աղջիկը իմ տա՞նն է ու արդյոք իմ տա՞նն է գիշերել, ես էլ ասացի`ոչ: Հասկացա, որ մի բան եղել է: Սկսեցինք փնտրել աղջկան, բայց չգտանք ու դիմեցինք ոստիկանություն»: Աղջկա հորաքույրը մեզ պատմեց, որ ոստիկանությունը նախ չի ցանկացել անդրադառնալ իր ահազանգին, սակայն իր համառության շնորհիվ ի վերջո որոնողական աշխատանքներ են սկսվել:

Կիմա Հակոբյանը երեկ մեզ պատմեց նաեւ, որ աղջկա մասին վեց օր ոչ մի տեղեկություն չի եղել: Վեցերորդ օրը երիտասարդները աղջկան տարել են Սիրահարների այգի եւ ազատ են արձակել: Ի պատասխան հարցին, թե ինչու են նրանք որոշել նման բան անել, Հակոբյանը ասաց, որ աղջկա անհետացման մասին հաղորդել է ոստիկանության «02» հաղորդաշարը, ինչը տեսնելով` հանցագործները վախեցել են եւ որոշել են «քանի շուտ է` ազատվեն խնդրից»: Ազատ արձակվելուց հետո աղջիկը պատմել է, որ իրեն առեւանգող երիտասարդները երեք հոգի էին, 17-19 տարեկան, նրանցից մեկի անունը Նարեկ է: Նա ասել է ու պնդել, որ նախկինում այդ երիտասարդներին երբեւէ տեսած չի եղել, ծանոթ չի եղել:

«Մի քանի օր առաջ էդ տղան զանգեց աղջկան, սկսեց գռեհիկ, փողոցային ձեւով խոսել, ասել, որ ոստիկաններին ոչ մի բան չպատմի: Այսինքն, ստացվում է, որ նա դեռ ազատության մեջ է, ազատ շրջում է, ինչ ուզում` անում է: Ես լուրջ կասկածներ ունեմ, որ ոստիկանությունը չի ցանկանում զբաղվել այս գործով»,- երեկ մեզ հետ զրույցում իր տարակուսանքը հայտնեց Կիմա Հակոբյանը եւ ավելացրեց, որ գաղափար անգամ չունի, թե ինչ է անում ոստիկանությունը իր անչափահաս զարմուհու նկատմամբ նման ստոր արարք կատարած երիտասարդներին հայտնաբերելու եւ պատժելու ուղղությամբ: Նա նաեւ պատմեց, որ աղջիկն այժմ գտնվում է մանկատան երեւանյան մասնաճյուղում, շատ ընկճված է ու հոգեբանական լուրջ խնդիրներ ունի, սակայն արդեն այցելել է ոստիկանություն եւ ամենայն մանրամասնությամբ պատմել իր հետ տեղի ունեցածը, նաեւ ցույց է տվել այն տունը, որտեղ իրեն պահել են վեց օր: Ոստիկանությունից երեկ մեզ հայտնեցին, որ տեղի ունեցածի վերաբերյալ նյութերը նախապատրաստվել են նախ Էրեբունու ոստիկանությունում, քանի որ աղջիկը որպես անհետ կորած որոնվել է հենց նրանց կողմից, սակայն նախօրեին այդ նյութերը ուղարկվել են Քանաքեռ- Զեյթուն վարչական շրջանի ոստիկանություն: Ոստիկանության հասարակայնության հետ կապերի եւ լրատվական վարչությունից էլ հայտնեցին, որ նշանակվել են փորձաքննություններ, եւ մի քանի օրից պարզ կլինի` կհարուցվի՞ քրեական գործ, թե՞ ոչ: