Չեմ թերագնահատում, Ռամիրեսն ուժեղ մարզիկ է, սակայն ես եմ հաղթելու, իսկապես լավ պատրաստված եմ. Արթուր Աբրահամ (լուսանկարներ)

Մարզումներից գոհ եմ, գոհ է նաև մարզիչս, իսկապես լավ պատրաստված եմ: Այս մասին ԼՈւՐԵՐ.com-ի թղթակցի հետ զրույցում ասաց պրոֆեսիոնալ բռնցքամարիկ, գերմիջին քաշային կարգում WBO վարկածով աշխարհի չեմպիոն Արթուր Աբրահամը՝ ապրիլի 9-ին Լաս Վեգասում 24-ամյա մեքսիկացի Խիլբերտո Ռամիրեսի դեմ կայանալիք մենամարտից առաջ:

- Արթուր, ինչպե՞ս են ընթանում նախապատրաստական մարզումները, գո՞հ եք արդյոք պրոցեսից:

- Շատ լավ են ընթանում, սկզբից մարզվեցի Բուլղարիայի Բերմեկեն քաղաքի հարակից սարերում, ապա Գերմանիայի Քինբաում քաղաքում: Մարտի 26-ին մեկնել եմ ԱՄՆ և այնտեղ շարունակելու եմ օրական 2 անգամ մարզվել: Այո, իմ մարզումներից գոհ եմ, գոհ է նաև մարզիչս՝ Ուլլի Վեգները:

- Ինչպե՞ս եք գնահատում մրցակցի շանսերը:

- Չեմ թերագնահատում, ուժեղ մարզիկ է, սակայն ես եմ հաղթելու:

- Օրերս Ուլլի Վեգները հարցազրույցի ժամանակ հայտարարել էր, որ երբեք չէր տեսել Ձեզ այդքան մոտիվացված մարզվելուց, ինչո՞վ է պայմանավորված նման մոտեցումը:

- Իսկապես լավ պատրաստված եմ: Միշտ չէ, որ Ուլլի Վեգները գոհ է լինում իմ մարզավիճակից կամ որ բարձրաձայնում է այդ մասին: Եթե հիմա նա խոսում է այդ մասին, ուրեմն շատ գոհ է իմ մարզավիճակից:

- Արթուր, անկախ մարտի արդյունքից՝ երկրպագուները ռևանշ մենամարտի ակնկալիք ունենա՞ն:

- Նման հարցերի պատասխաններըը տալիս են մարզիկների մենեջերները, ամեն դեպքում, ես միշտ պատրաստ եմ ընդունելու ինձ նետված ձեռնոցները:

-Տակտիկական նոր մոտեցման այս մենամարտում ականատես կլինե՞նք:

-Մարտավարությունս չեմ ներկայացնի, սակայն կասեմ, որ մարզչիս հետ մշակել ենք համապատասխան տակտիկա՝ մրցակցիս ոճին համապատասխան:

- Այս անգամ ովքե՞ր են աջակցելու Աբրահամին մարտի ժամանակ: Ձեր կինը ներկա լինելո՞ւ է:

- Ընկերներ, հարազատներ, իմ մարտարվեստի երկրպագուները կհետևեն մարտին, իսկ կինս տանից կհետևի:

- Հարցազրույցներից մեկում նշել էիք, որ դիտարկում ենք Ֆյոդոր Չուդինովի հետ մենամարտելու տարերակը: Ի՞նչ փուլում է այն:

-Հաջորդ մենամարտերի մասին կխոսեմ ապրիլի 9-ից հետո: Հիմա դեռ առաջնային նպատակս ապրիլի 9-ի մենամարտում հաղթելն է:

Զրուցեց Լիանա Թորոսյանը