Խմբագրական. Ի՞նչ են տալիս մեզ Վաչե Գաբրիելյանի թվերը

Փաստորեն, եվրասիական ինտեգրումը Հայաստանի համար շահավետ դուրս եկավ: Տեսնո՞ւմ եք, իսկ մենք չգիտեինք: Ու որտեղի՞ց իմանայինք, եթե այդ շահավետությունը ոչ մի կերպ չի ուզում երևալ, ինչպես ապրում էինք, այդպես էլ շարունակում ենք ապրել: Թեպետ կան մարդիկ, ովքեր այդ շահավետությունը տեսնում են. նրանցից մեկն էլ փոխվարչապետ Վաչե Գաբրիելյանն է, ով ասել է, թե նախարարությունում վերլուծության արդյունքում են նման եզրահանգման եկել:

Շատ հարմար տարբերակ է իրականում՝ ներկայացնել պատկերն ինչպես որ ձեռնտու է՝ հղում անելով վերլուծություններին, որոնցից սովորական ընթերցողները դժվար թե ինչ-որ բան հասկանան: Այստեղ նույնիսկ թվեր կարելի է մեջբերել՝ միջսահմանային առևտրի ենթավարկանիշում Հայաստանը 58-րդ տեղից հայտնվել է 29-րդում, ընդհանուր վարկանիշում էլ՝ 38-րդից հայտնվել է 35-րդ հորիզոնականում:

Պետք է ասել, որ գեղեցիկ է հնչում և ընդհանրապես՝ թվերն ինչ-որ թվացյալ պատկեր են ստեղծում, բայց այդպես էլ անհասկանալի է մնում, թե ի՞նչ է մեզ տալիս այդ թվերի փոփոխությունը, և ինչու մեր կյանքում էականորեն ոչինչ չի փոխվում՝ լինենք ԵՏՄ-ի կազմում, թե առանց ԵՏՄ-ի: Փոխվում են միայն ակնկալիքները. լինելով խոշոր միության անդամ՝ ակամա ավելի շատ ակնկալիքներ ես ունենում, որոնք, որպես կանոն, չեն արդարանում և առաջ են գալիս լրացուցիչ հիասթափություններ:

Կարեն Վարդանյան