Նոր զարգացումներ՝ Մելքումյանի կյանքում…

Ասում են՝ առաջիկայում Հայաստանի կրթական համակարգում որոշակի տեղաշարժեր են սպասվում: Մասնավորապես՝ համառ խոսակցություններ են շրջանառվում այն մասին, որ, ամենայն հավանականությամբ, հունիսին սպասվում են Երևանի պետական տնտեսագիտական համալսարանի ռեկտորի ընտրություններ. գործող ռեկտորի՝ Կորյուն Աթոյանի պաշտոնավարման ժամկետը լրանում է մայիսին:

Խոսակցություններ կան նաև, որ ռեկտոր դառնալու հավակնություններ ունի, ո՛չ ավել, ո՛չ պակաս, ԲՀԿ-ական պատգամավոր Միքայել Մելքումյանը, այն նույն Մելքումյանը, որը հանրությանն ավելի շատ հայտնի է իր ընդդիմադիր բոցաշունչ ելույթներով, իշխանություններին աջ ու ձախ պախարակելով ու էլի այսպիսի՝ միայն «դուխով տղուն» հատուկ արարքներով:

Ի դեպ՝ վերջինս նույն համալսարանում դասախոս է, պրոֆեսոր և ամբիոնի վարիչ է աշխատում: Ու չնայած դեռևս, Տնտեսագիտական համալսարանի ռեկտոր Կորյուն Աթոյանի պնդմամբ, թեկնածուների վերջնական ցանկն հայտնի չէ, քանզի մրցույթ դեռ չի հայտարարվել, բայց կարելի է ենթադրել, որ Մելքումյանի թեկնածությունը, այնուամենայնիվ, կդիտարկվի այդ համատեքստում: Ճիշտ է՝ հանուն արդարության պետք է ասենք, որ ինքը՝ Մելքումյանը, իր՝ ապագա ռեկտոր դառնալու մասին խոսակցությունները դեռևս հերքում է, բայց հաշվի առնելով հայկական իրականությունն ու միայն քաղաքական գործիչներին հատուկ ճկունությունը՝ ամենևին էլ չենք կարող բացառել գոնե այն, որ նման փառասիրական մտքեր, այնուամենայնիվ, Մելքումյանի բովանդակ մտքում ծագած կլինեն. կարծում ենք՝ վատ գործ չէ ու «գազան» ընդդիմադիրի «բերանն ինչ-որ կերպ փակելու» շատ հարմար գործիք կարող է դառնալ իշխանությունների համար:

Չցանկանալով ժամանակից առաջ անցնել ու Միքայել Մելքումյանին անժամանակ հռչակել «Ժողի» ռեկտոր, այնուամենայնիվ, պետք է մի տարօրինակ զուգադիպության մասին խոսենք: Եթե հետևում եք այս պատգամավորի խորհրդարանական գործունեությանը, ապա կհամաձայնեք, որ դատելով վերջին ժամանակների նրա գործունեությունից՝ դժվար կարելի է նրան համարել ինչ-որ ընդդիմադիր քաղաքական ուժի ներկայացուցիչ. վերջին շրջանում, թերևս, դժվարությամբ կարելի է գտնել կառավարության կողմից առաջարկված որևիցե ծրագիր կամ գործողություների պլան, որոնց Մելքումյանն ինչպես հարկն է ընդդիմանար. նա իր քաղաքական կարիերայի գոնե այս փուլում նախընտրում է սպասողական կեցվածք որդեգրել ու, ինչպես ասում են, շատ չբզբզալ. կարող է իշխանությունները գնահատեն իր համեստությունն ու օրերից մի օր, Մելքումյանի համար մի պայծառ օր յուղոտ պաշտոն առաջարկել. օրինակ՝ ռեկտորի գործ...

Այն տեսակետը, որ հայաստանյան քաղաքական դաշտը գոնե վերջին ժամանակներս մի տեսակ լպրծուն ու լղոզված է դարձել, ինչպես գիտեք, կիսում են շատերը. բոլոր ընդդիմադիր ուժերն էլ, բայց հատկապես քաղաքական գործիչներն իրենց համար գործողությունների պլան մշակելիս ավելի հաճախ շեշտը դնում են ոչ թե ասենք նույն ժողովրդի կամ գոնե դրա մի մասի շահերի վրա, այլ ելնում են բացառապես սեփականից՝ հոգ տանելով նախևառաջ իրենց հետագա կարիերայի մասին՝ չնայած տեսախցիկների ու լրագրողական ձայնագրիչների առաջ ձևանում են՝ բացառապես ժողովրդի դարդ ու ցավով ապրող մարդիկ, որ ի վերուստ կոչված են՝ պետական ամենաբարձր ատյաններում առաջ տանելու միմիայն հասարակության շահերը՝ հերոսաբար անտեսելով սեփական կարիքները: Իսկ թե կոնկրետ Մելքումյանի հետագա կյանքն ինչպես կդասավորվի, ինչ խոսք, կարող է ցույց տալ բացառապես ժամանակը, բայց այն, որ ռեկտորի պաշտոնը փափագելի է գրեթե ցանկացած՝ գիտությամբ զբաղվող մեկի համար, անհերքելի իրողություն է. վստահ ենք՝ բացառություն չէ նաև Մելքումյանը:

Դավիթ Բաբանով