«Մենք դավաճաններին յոթ պորտով չներող ազգ ենք, իշխանությունները ժողովրդական հակազդեցությունից պետք է վախենան»

ԼՈՒՐԵՐ.com-ի զրուցակիցն է «Հայազն» կուսակցության վարչության անդամ Արմեն Մկրտչյանը։

- Արմեն, այս օրերին բավական բուռն քննարկվում է ՌԴ արտգործնախարար Սերգեյ Լավրովի այցը Հայաստան և ղարաբաղյան հարցի լուծման Կրեմլի տարբերակը, որը, ըստ մամուլի հրապարակումների, իրենից ներկայացնում է տարածքների հանձնում։ Ինչպե՞ս եք դրան վերաբերվում և արդյոք այդ լուծումը հավանական համարո՞ւմ եք։

- ԵՏՄ մտնելու չարաբաստիկ օրվանից հետո հայ-ռուսական երբեմնի դաշնակցային հարաբերություններից մնացած բեկորները ևս վերածվեցին ճորտ-սեփականատեր հարաբերության, ու բնական է, որ գերտերություն Ռուսաստանն իր ճորտերով, տվյալ դեպքում Հայաստանով, ազատ է առևտրի առարկա դարձնելու մեջ: Լավրովի այցը չի դիտարկվում որպես հայանպաստ լուծմանը միտված այց, ուստի այն ուղղորդվելու է մեր և այլոց կողմից կազմակերպված բողոքի ցույցերով: Մենք զիջելու ոչինչ չունենք: Մարդիկ, ովքեր կողմ են զիջումներին՝ կա՛մ դավաճան են, կա՛մ անվտանգությունից ոչինչ չպատկերացնող մարդիկ: Ի՞նչ զիջման մասին կարող է խոսք լինել, երբ ընդամենը 2-3 բարձունք քառօրյա պատերազմում վերցրած Ադրբեջանի ինֆորմացիոն դաշտը լցված է «Երևանում հեսա չայ ենք խմելու» և նմանատիպ կոչերով:

- Ըստ Ձեզ՝ իշխանությունները կգնա՞ն այդ քայլին, անգամ Ռուսաստանի ճնշման ներքո։

- Իշխանությունները լինելով ոչ լեգիտիմ ու հանցագործ՝ շատ հնարավոր է չդիմանան «մեծ եղբոր» զիջումներին: Բայց իրենք պետք է ժողովրդական հակազդեցությունից վախենան: Մենք դավաճաններին յոթ պորտով չներող ազգ ենք:

- Հասարակությունն արդեն իսկ բողոքի ձայն է բարձրացնում, բողոքի ակցիաներ են կազմակերպվում տարբեր գերատեսչությունների մոտ։ Ի՞նչ եք կարծում՝ եթե իշխանություններն ամեն դեպքում պարտադրված նման զիջումների գնան, ի՞նչ կսպասի իրենց։ Հասարակության արձագանքն ինչպիսի՞ն կլինի։

-Չի գնա: Ոչ մի իշխանություն Հայաստանում ինքնասպան չի: Ելքը մեկն է՝ ամբողջական հրաժարական: Մենք գիտակցում ենք որոշ առումներով էլ մտնում ենք այդ մարդկանց դրության մեջ: Դժվար է դիմանալ նման ճնշման՝ չունենալով տարրական լեգիտիմություն: Էս տարիներին ժողովուրդ-ՀՀԿ անջրպետն այնքան է խորացել, որ, օրինակ, Աշոտյանի ոտքը կոտրելը կամ Գալուստ Սահակյանի առողջական խնդիրները բոլորի ուրախությունն են դառնում: Վատ բան եմ ասում, բայց մեղքն իրենցն է: Հիմա Սերժ Սարգսյանն ունի բացառիկ շանս՝ հեռանալ որպես խոհեմ գործիչ։ Նա պետք է դիմի ժողովրդին, խնդրի ներել իրեն ու իր «թայֆային», հրաժարական տա ու երաշխավորի արտահերթ նախագահական ու խորհրդարանական ընտրությունների թափանցիկությունը:

- Կգնա՞ Սերժ Սարգսյանն այդ քայլին։

- Դե լուծումը դա է: Դրա համար էլ է բացառիկ քաջություն պետք: Չգիտեմ՝ կկարողանան գոնե մի անգամ ներուժ գտնել ու ժողովրդի հետ անկեղծ խոսել, բայց լուծումը դա է:

- Ի՞նչ եք կարծում, այս փուլում ղարաբաղյան խնդրի լուծումը ռազմակա՞ն ճանապարհն է, թե՞ ամեն դեպքում դիվանագիտականը։

- Արցախի խնդիրը մեզ համար լուծվել է դեռ երկու տասնամյակ առաջ՝ ռազմական ուղով։ Ցավոք, դիվանագիտական առումով մեզ մոտ միայն պարտություններ ենք արձանագրել ու արձանագրում:

Հարցազրույցը՝ Քրիստինա Աղալարյանի