Եթե իշխանությունները գնան զիջումների, վաղը նրանք կհայտնվեն փողոցում, մյուս օրը՝ բանտերում. արցախցի պատգամավոր

Եթե իշխանությունները փորձեն գնալ զիջումների, ես համոզված եմ՝ վաղը նրանք կհայտնվեն փողոցում, մյուս օրը՝ բանտերում։ Այս մասին ԼՈՒՐԵՐ.com-ի հետ զրույցում ասաց Արցախի Ազգային ժողովի պատգամավոր, Արցախյան ազատամարտի մասնակից, Սարինշենի 1-ին գումարտակի հրամանատար Վահան Բադասյանը։

«Ցանկացած որոշում պետք է լինի բնական։ Ադրբեջանը պատերազմ սկսեց, խախտեց ԼՂՀ Սահմանադրությունը, քաղաքացուն ռեալ վտանգ սպառնաց, սպանվեց երեխա, տանը խոշտանգվեցին ծերեր, հրետակոծության ենթարկվեցին բնակավայրեր։ Եվ բնականոն ձևով դրան համարժեք ոտքի է կանգնեց ամբողջ հայ ժողովուրդը, արյուն թափեց և կանխեց թշնամու ագրեսիան։ Ուստի, ոչ մի քաղաքական ուժ, ոչ մի պետություն, գերտերություն, նույնիսկ միջուկային զենքի կիրառման սպառնալիքով չեն կարող պարտադրել մեր ժողովրդին ինչ-որ զիջումների գնալ։ Իսկ եթե իշխանությունները փորձեն գնալ զիջումների, ես համոզված եմ՝ վաղը նրանք կհայտնվեն փողոցում, մյուս օրը՝ բանտերում»,- իր տեսակետը հստակ ներկայացրեց Բադասյանը։

Վերջինս նշեց, որ իրեն չի հետաքրքրում՝ իշխանությունները դա գիտակցում են, թե ոչ. «Ռուսաստանը ցանկացած պլան կարող է ունենալ։ Ես չեմ մեղադրում Ռուսաստանին, քանի որ Ռուսաստանի պլանները իրականացնելուն հետամուտ է լինում Հայաստանի Հանրապետության նախագահի պաշտոն զբաղեցնող Սերժ Սարգսյանը, որը հակասում է մեր ազգային շահերին։ Ես բազմիցս ասել եմ՝ Սերժ Սարգսյանը հնարավորություն ունի վերջապես նախագահ դառնալու։ Եթե ինքը չկարողանա, ապա դուրս կմնա այս գործընթացից»։

Հավելենք, որ այսօր նախատեսվում է ՌԴ արտգործնախարար Սերգեյ Լավրովի այցը Հայաստան, որի ժամանակ հանդիպումներ կլինեն Սերժ Սարգսյանի, ԱԳ նախարար Էդուարդ Նալբանդյանի հետ։ Քննարկվելու է Ղարաբաղյան հակամարտության կարգավորման վերաբերյալ մի շարք հարցեր։

Ք. Աղալարյան