Հերմինե Նաղդալյանը համաձայն չէ, որ ձախողվել ենք դիվանագիտական ոլորտում

Ազգային ժողովի փոխնախագահ Հերմինե Նաղդալյանը համաձայն չէ այն տեսակետին, որ մեր երկիրը միշտ դիվանագիտական ոլորտում պարտության է մատնվում և կարծես բարկությամբ հարց է բարձրացնում՝ որտեղի՞ց է Ձեզ մոտ այդ կարծիքը:

ԼՈւՐԵՐ.com-ի թղթակցի տեղեկացմամբ՝ Հերմինե Նաղդալյանն այսօր լրագրողների հետ զրույցում ասաց, որ Մինսկի խումբը վերջին հինգ տարվա մեջ հինգ հայանպաստ որոշում է կայացրել ոչ թե արտգործնարարաների, այլ Մինսկի խմբի ղեկավարների մակարդակով, այսինքն՝ Օբամայի, Պուտինի, Օլանդի մակարդակով հայանպաստ որոշումներ են կայացվել:

«Սահմանին կանգնած զինվորը հաղթում է իր կռվում, դիվանագետը՝ իր կռվում: Ուրեմն, ձեր կարծիքով, դա դիվանագիտական աշխատանքի ձախողո՞ւմ է: Արտաքին քաղաքականությունն այն աշխատանքն է, որ շատ երևացող չէ, որն իր բնույթով մեծ մասամբ հեռու է թափանցիկությունից, բայց իր արդյունքը երևում է»,- ասաց Նաղդալյանը:

Նրա խոսքով՝ ապրիլի 1-ի լույս 2-ի գիշերն Ադրբեջանի կողմից սանձազերծված լայնածավալ ռազմական գործողություններին հետևել են եվրոպական բոլոր երկրների ղեկավարների հայտարարությունները, որոնցով կոչ էին անում վերադառնալ 1994 թվականի պայմանագրին:

Բացի այդ, գործողությունների ընթացքում ԵԱՀԿ բոլոր երկրների լիդերները մատնացույց են արել՝ նստել բանակցությունների սեղանի շուրջ:

«Ամենակարևորն այն էր, որ եվրոպական բոլոր երկրները միահամուռ կերպով չընդունեցին եռակողմ պայմանագրից դուրս գալու Ադրբեջանի ցանկությունը: Վերադարձրին բանակցային սեղան, վերադարձրցին Մինսկի խմբի շրջանակ: Եթե Մինսկի խմբի մադրիդյան սկզբունքներն Ադրբեջանի համար բարենպաստ լինեին, ինքը դրա դեմ կպայքարե՞ր, այսինքն՝ եթե մարդիկ հինգ տարի անընդհատ «ռմբակոծում» են Մինսկի խումբը և «ռմբակոծում» են իր առաջարկած մադրիդյան սկզբունքները, մենք՝ հայկական հասարակությունս, կարո՞ղ ենք մտածել, որ դա ադրբեջանպաստ է»,- ասաց Նաղդալյանը:

Իսկ ինչ վերաբերում է նրան, թե մադրիդյան սկզբունքներն ինչքանո՞վ են մեզ համար նպաստավոր, ասաց, որ դա այն չէ, ինչ մենք կերազենք, բայց դա մեզ համար հիմք է, որ աշխատենք ու գնանք դեպի խնդրի լուծում: