Ռուբեն Վարդանյանն անիրական էր համարում երազանքի` «Ավրորա» մրցանակաբաշխության իրականացումը

100 LIVES նախաձեռնության համահիմնադիր, հայտնի գործարար Ռուբեն Վարդանյանն անիրական էր համարում «Ավրորա» մրցանակաբաշխության իրականացումը: Այս մասին գործարարը խոստովանեց ապրիլի 23-ին 100 LIVES եւ «Ավրորա» մրցանակ նախաձեռնությունների կազմակերպած Aurora Dialogues քննարկումների մեկնարկին:

«Ուրախ եմ ձեզ ողջունել հատկապես Մատենադարանի կամարների ներքո: Երկու տարի առաջ, երբ պատմում էի իմ երազանքի մասին, այն անիրական էր թվում: Այսօր փաստ է, որ հավաքվել ենք Հայաստանի եզակի հաստատությունում՝ հին ձեռագրերի ինստիտուտում: Ուրախ եմ ձեզ հայտնել հետևյալը՝ մենք 100 LIVES-ի շրջանակում հավաքեցինք ցեղասպանության վերապրածների պատմությունները, ներկայացրինք դրանք: Սրանք պատմություններ են, որտեղ ընտանիքի անդամները պատմում են իրենց փրկության մասին: Դրանք այսօր շատ ազդեցիկ են հնչում: Մենք նաև նախաձեռնել ենք թվայնացնել արխիվային փաստաթղթերը: Ցավոք, Օսմանյան կայսրությունում Հայոց ցեղասպանությանն առնչվող շատ փաստաթղթեր չեն գտնվել, բայց եղածները պահպանելու ենք սերունդների համար»,- նշեց Ռուբեն Վարդանյանը:

Նրա խոսքով՝ նախաձեռնության շրջանակում սիրիացի փախստական 100 երեխաների համար կրթաթոշակ է սահմանվել, որպեսզի նրանք սովորեն լավագույն դպրոցներում:

«Մեր ձգտումն է պահպանել մեր պատմությունը, թույլ չտալ, որ այն մոռացվի: Այս օրերին չափազանց կարևոր թեմաների մասին կխոսենք: Անկախ այն բանից, թե աշխարհի որ ծայրում ենք ապրում, կարող ենք փոփոխություններ իրականացնել: Համոզված եմ, որ միասին կփոխենք աշխարհը»,- հավելեց Վարդանյանը: