Ես դպրոցում եմ սովորել Հայոց ցեղասպանության մասին. «Ավրորա»-ի մրցանակակիր

Բուրունդիի Խաղաղության տան (Maison Shalom) խնամքի տան և Rema հիվանդանոցի աշխատակից, «Ավրորա» մրցանակի դափնեկիր Մարգարիտ Բարանկիցեն Հայոց ցեղասպանության մասին սովորել է դպրոցում: Այս մասին մրցանակակիրը խոստովանեց արարողության ավարտին անցկացված ասուլիսի ընթացքում:

«Ես Հայոց ցեղասպանության մասին դպրոցում եմ սովորել և Աստվածաշնչի միջոցով եմ հասկացել այն: Այս մարդիկ (խմբ.- ի նկատի ունի հայերին) կառուցում են իրենց հայրենիքը: Զարմացած եմ, թե ինչ տեսակի հայրենասիրական զգացմունքներ կան այստեղ: Ես մտածեցի, որ պետք է այստեղ վերադառնամ: Եթե նույնիսկ չունենամ հնարավորություն վերադառնալու, քանի որ 60-ամյակս եմ նշում, այն երեխաները, որոնց ես կրթում եմ, կվերադառնան: Շնորհակալություն եմ հայտնում հայերին մեզ սովորեցնելու կանգուն մնալ և երբեք չթուլանալ»,-«Արմենպրես»- ի փոխանցմամբ' նշեց Մարգարիտ Բարանկիցեն:

Նա իր ելույթի ընթացքում իր հիացմունքն արտահայտեց Հայաստանի և հայ ժողովրդի նկատմամբ' շեշտելով, որ հայ ազգն իրական ազգ է' իրական արժեքներով:

«Ավրորա» մրցանակի ընտրող հանձնաժողովը կարեւորել է Մարգարիտ Բարանկիցեի արարքների բացառիկ ազդեցությունն ու նշանակությունը. նա վտանգելով իր կյանքը փրկում է մարդկանց՝ նրանց տալով գոյատեւելու եւ բարօրության հասնելու հնարավորություն: Բարանկիցեն մեծացել է Արեւելյան Աֆրիկայի Բուրունդի պետությունում, աշխատում է Բուրունդիի Խաղաղության տուն (Maison Shalom) խնամքի տանը և Rema հիվանդանոցում: Նրա համար դժվար է հավատալ, որ իր առաքելությունն սկսելու պահից, նա օգնել է ավելի քան 20,000 որբ եւ կարիքավոր երեխաների։ Նա վերամիավորել է իրենց ընտանիքներից պատերազմի կամ բանտարկության հետեւանքով բաժանված երեխաներին, եւ նոր «տուն» է ստեղծել որբ երեխաների համար: Նրա աշխատանքը շարունակվում է. հիմա նա փորձում է ազատել Բուրունդիում բանտարկված երեխաներին եւ օգնել ապաստանել Բուրունդիի փախստականներին Ռուանդայում։ Մրցանակի դափնեկիրն ստացել է 100.000 ԱՄՆ դոլարի պարգեւ եւ նվիրատվության շղթան շարունակելու հնարավորություն. 1.000.000 ԱՄՆ դոլարի դրամաշնորհի ներկայացնելով իրեն ոգեշնչած մարդասիրական երեք կազմակերպություններին։

The Aurora Prize for Awakening Humanity/«Ավրորա» մրցանակը 100 LIVES նախաձեռնության համահիմնադիրներ Վարդան Գրեգորյանի, Նուբար Աֆեյանի եւ Ռուբեն Վարդանյանի մարդասիրական ձեռնարկն է։ Հիմնադիրները փորձում են ձեւավորել մարդասիրական համաշխարհային նոր շարժում։ «Ավրորա» մրցանակը շնորհվում է Հայոց ցեղասպանությունը վերապրածների անունից եւ ի երախտագիտություն նրանց, ովքեր փրկության ձեռք մեկնեցին հայ ժողովրդին: Մրցանակին արժանանալու է մերօրյա այն հերոսը, որն օգնում է մարդկանց՝ անձնվիրաբար եւ բացառիկ ջանքերով: