Ոստիկանությանը քծնող պատգամավորը

Ապրիլի 22-ին «Մենք ենք տերը մեր երկրի» նախաձեռնությունն Ազատության հրապարակից երթ էր կազմակերպել դեպի Բաղրամյան պողոտա՝ չենթարկվելով ոստիկանության պահանջին: Դրա արդյունքում Բաղրամյան պողոտայի սկզբնամասից 42 քաղաքացի բերման ենթարկվեց:

Նրանց մեջ կային նաև ԶԼՄ-ների ներկայացուցիչներ, ովքեր բերման ենթարկվեցին իրենց աշխատանքն իրականացնելիս:

Սոցիալական ցանցերում լայնորեն քննարկվեց և քննադատվեց լրատվամիջոցների ներկայացուցիչներին բերման ենթարկելու փաստը, բայց կար մի մարդ, ով այդ միջադեպին տվեց այլ որակում. «Մեր երկրում շատ լրագրողների թվում է, որ իրենց ամեն ինչ կարելի է և իրենք օրենքից վեր են։ Շատ անգամ նրանք մոռանում են, որ չի կարելի խոչընդոտել ոստիկանության օրինական պահանջներին և խառնաշփոթ ստեղծում տարբեր իրավիճակներում։ Ի՞նչ է ենթադրում լրագրողի բերման ենթարկելու մասին «տրագեդիան», ի՞նչ է, լրագրողը քաղաքացի չէ, լրագրողն անձեռնմխելի՞ է»:

Այս տողերի հեղինակն անմեղսունակ պատգամավոր Վահան Բաբայանն է, ով թեպետ մեծ փորձառություն ունի լրագրողների հետ աշխատելու՝ եղել է ԲՀԿ-ի մամուլի խոսնակը, բայց անձնական շահերը նրան թույլ չեն տալիս հասկանալու, որ մարդը, եթե լրագրող է աշխատում ու գտնվում է ոստիկանության ու ակտիվիստների «միջակայքում», չի նշանակում, որ նա պաշտպանում է որևէ կողմի:

Նա ԲՀԿ-ից դուրս գալուց հետո ակտիվ փնտրտուքների մեջ է, թե այս անգամ որ կուսակցություն մտնի, որ հաջորդ խորհրդարանում կրկին սողոսկի Ազգային Ժողով: Քաղաքական դաշտում մնացել է միայն մեկը, ուր նա կարող է մտնել և համարել իր կյանքում պրոգրես՝ ՀՀԿ-ն է, սակայն, որոշ խոսակցությունների համաձայն, Բաբայանի մուտքն այդ կուսակցություն չի ողջունվել, և ՀՀԿ-ի արտահաստիքային աշխատող լինելուց բացի, այլ հեռանկար նրան չի սպասվում:

Այս պատգամավորին դեռևս շատ տարիներ են պետք, որպեսզի ի վերջո կողմնորոշվի, թե որն է իր գաղափարախոսությունը, ինչ է ուզում կյանքից կամ առհասարակ ինչ գործ ունի քաղաքականությունում:

Նրա վերջին ակտիվությունից կարելի է ենթադրել, որ Վահան Բաբայանն աչք է դրել ոստիկանության համակարգի վրա, առիթը չի կորցնում քծնելու ոստիկանությանը, մարդ ես, հնարավոր է՝ հոգնել է օրենսդիր աշխատանքից և որոշել է մտնել ուժային կառույց:

Նա առաջինն էր, ով շնորհավորեց ոստիկանության օրը, ակցիայից հետո առաջին ու միակն էր, ով փնովեց լրագրողներին՝ կրկին ի պաշտպանություն ոստիկանության: Դե իսկ մնում է հավատալ, որ Վլադիմիր Գասպարյանը չի հավատա Բաբայանի նվիրվածությանը:

Ն. Ա.