Հետաքրքիր է, բացի «Մենք ենք տերը մեր երկրի»-ից, է՞լ որ նախաձեռնություններն են Սէֆիլյանինը

Այն, որ «Հիմնադիր խորհրդարանը» բնավ միամիտ չէ և ուղղակիից բացի նաև անուղղակի ու խորամանկ մեթոդներով գործելու վարպետ է, դա գիտեինք, և դա սպասելի էր: Բայց վերջին բացահայտումը ցույց տվեց, որ այդ կառույցը և իր ղեկավար Ժիրայր Սէֆիլյանը սադրիչ գործունեության և անազնիվ տեխնոլոգիաներ կիրառելու մեջ բացառիկ տաղանդ ունեն: Իսկ պարզվեց ընդամենն այն, որ ապրիլի 22-ի երթը դեպի ՀՀ նախագահի նստավայր նույնպես Սէֆիլյանի կազմակերպածն էր, «Մենք ենք տերը մեր երկրի» կոչվող շարժման հետևում էլ իրականում կանգնած է նույն «Հիմնադիր խորհրդարանը»:

Հետաքրքիրն այն է, որ ինքը՝ Սեֆիլյանը և իր «զինակիցներն» այդ օրը Բաղրամյանում չեն երևացել և արդեն իսկ հասկանալի է, թե ինչ նպատակով՝ որպեսզի ոչ ոք չկասկածի, թե «Մենք ենք տերը մեր երկրի» շարժումն իրենցն է: Փաստորեն, Սէֆիլյանն անցել է ստվերային գործունեության, իսկ դա ևս մեկ անգամ փաստում է, որ այդ օրվա նպատակը կարող էր լինել միայն սադրանքը, հակառակ դեպքում բացեիբաց կգործեին, Ժիրայր Սէֆիլյանն ու իր համախոհներն էլ Բաղրամանում կլինեին, ոչ թե մեկ այլ տեղից կհետևեին, թե ինչպես են իրենց ստեղծած նախաձեռնության երիտասարդ ու «ժիր» անդամները «ժրաջան» կերպով փորձում կատարել իրենց վրա դրված առաջադրանքը: Սա ավելի քան տրամաբանական է:

Հետաքրքիր է՝ բացի «Մենք ենք տերը մեր երկրի»-ից, էլ ո՞ր նախաձեռնություններն են իրականում «Հիմնադիր խորհրդարանինը»: Կարծում եմ՝ մի օր դա էլ կպարզվի:

Կարեն Վարդանյան