Սահմանին կանգնած զինվորը պետք է համոզված լինի, որ իր թիկունքում մրցունակ ու ուժեղ պետություն է. պատգամավոր

Քիչ առաջ Ազգային ժողովում Ընտրական օրենսգրքի քննարկմանը ելույթ ունեցավ ՀԱԿ խմբակցության անդամ Լյուդմիլա Սարգսյանը, ով կարծում է, որ տարիներ շարունակ Հայաստանի պետականության զարգացման  արգելակման հիմնական պատճառներից մեկը եղել և մնում է անկատար ընտրական համակարգը և շարունակաբար կեղծվող ընտրությունները: 

«Թեև այսօր կարևորագույն խնդիրը ԼՂ հակամարտության կարգավորումն է, սակայն դիվանագիտական հաջողություններ գրանցելու համար պետք է ունենալ թիկունք, իսկ դա մրցունակ պետությունն է: Այս հարցում չպետք է թերագնահատել ընտրությունների դերը»,- ասաց պատգամավորը:

Լյուդմիլա Սարգսյանի խոսքով՝ երբ այսօր Ղարաբաղյան ճակատում անհանգիստ է, փաստացի պատերազմական վիճակ, երբ հայկական զույգ պետությունների ազգային անվտանգությունն առավել քան երբևէ հանդիպում է լուրջ մարտահրավերների, մեզ անհրաժեշտ է ապահովել համախմբում, որը չպետք է լինի այսրոպեական և պետք է ստանա ինստիտուցիոնալ բնույթ:

«Դա կարող է տեղի ունենալ ընտրական ինստիտուտի հանդեպ վստահության մթնոլորտ ստեղծելու դեպքում: Նախագծի ուսումնասիրությունը ցույց է տալիս, որ իշխանությունը մի շարք առանցքային հարցերում միայն մասամբ է ընդառաջ գնացել քաղաքական ուժերի և հասարակական սեկտորի պահանջներին, և առաջարկված լուծումները կարելի է համարել թերի»,- ասաց պատգամավորը:

Պատգամավորի խոսքով՝ ընտրական գործընթացի ժողովրդարացման աստիճանը կախված է նաև մեր հասարակության իրավագիտակցության մակարդակից: Հասարակությունը պետք է մեկընդմիշտ հրաժարվի ընտրակաշառքով քվեարկելու արատավոր պրակտիկայից: Որպեսզի դրան հասնենք, նախ և առաջ չպետք է ընտրակաշառք բաժանել:

«Ղարաբաղա-ադրբեջանական քառօրյա պատերազմը պետք է հետևությունների առիթ հանդիսանա, թե՛ իշխանության և քաղաքական մնացյալ ուժերի և թե՛ հասարակության համար: Հարկ է քաղաքական և հասարակական կամք դրսևորել և անցկացնել օրինական խորհրդարանական ընտրություններ: Սահմանին կանգնած մեր զինվորի համար ամենամեծ աջակցությունը կլինի այն, որ խորապես համոզվի, որ իր թիկունքում ունի միասնական ժողովուրդ և մրցունակ ու ուժեղ պետություն, այս քառօրյա պատերազմը պետք է սթափեցնի մեզ բոլորիս»,- ասաց տիկին Սարգսյանը: