Ավարտվեց ծանրամարտի Հայաստանի երիտասարդական առաջնությունը

Երևանի օլիմպիական հերթափոխի պետական մարզական քոլեջում ավարտվեց ծանրամարտի Հայաստանի 2016 թվականի երիտասարդների առաջնությունը:

Մրցումային վերջին օրը Հայաստանի չեմպիոնի կոչման համար պայքարեցին ծանր քաշայինները: 94 կգ քաշային կարգում չեմպիոն դարձավ Սամվել Գասպարյանը (երկամարտ՝ 333 կգ): Երկրորդ և երրորդ տեղերում են Հարություն Ենգիբարյանը (երկամարտ՝ 320 կգ) և Արսեն Մարտիրոսյանը (երկամարտ՝ 316 կգ): 105 կգ քաշային կարգում երկրի չեմպիոն դարձավ Հովհաննես Ավդալյանը (երկամարտ՝ 336 կգ): Արծաթե մեդալակիր դարձավ Սարգիս Կիրակոսյանը (երկամարտ՝ 305 կգ), իսկ բրոնզե մեդալակիր՝ Նարեկ Մաթևոսյանը (երկամարտ՝ 295 կգ): +105 կգ քաշային կարգում ոսկե մեդալակիր դարձավ Վարազդատ Լալայանը (երկամարտ՝ 335 կգ): Նրան հաջորդեցին Սլավիկ Ջանոյանը (երկամարտ՝ 331 կգ) և Սիմավոն Մկրտչյանը (երկամարտ՝ 298 կգ):

Նախօրեին Հայաստանի չեմպիոններ էին դարձել նաև 69 կգ Լևոն Մանուկյանը, 77 կգ Ժորժ Եղիկյանը և 85 կգ Մանուկ Մկրտչյանը:

Երիտասարդական հավաքականը աշխարհի առաջնությանը նախապատրաստվելու համար ուսումնամարզական հավաքի կմեկնի արդեն ապրիլի 30-ին՝ Ծաղկաձոր: Այս մասին տեղեկացնում է ՀԱՕԿ լրատվության բաժինը: