Վլադիմիր Սպիվակովին երևանյան փողոցներում ողջույններով և ժպիտներով են դիմավորել

Ամբողջ աշխարհում սիրո էներգիայի պակաս կա, բայց հայ ժողովրդի դեպքում ամեն ինչ այլ կերպ է: Այս մասին Մոսկվայի վիրտուոզներ» պետական կամերային նվագախմբի երևանյան երկրորդ համերգի ընթացքում խոստովանեց աշխարհահռչակ դիրիժոր Վլադիմիր Սպիվակովը:

«Ես մտածում էի, թե ինչու աշխարհում շատ դժբախտություններ կան: Ոչ միայն Հայաստանում և այլ երկրներում.ընդհանրապես աշխարհում: Կարծում եմ, որովհետև մարդկությունն ապրում է հետաքրքրությունների և գաղափարների միջև: Իսկ իրականությունը հաղթում է գաղափարին: Ամբողջ աշխարհում սիրո էներգիայի պակաս կա»,- «Արմենպրես»-ի փոխանցմամբ'նշեց Վլադիմիր Սպիվակովը:

Իր ելույթում ճանաչված դիրիժորը մեջբերեց նաև Դանթեի խոսքերը' նշելով, որ նա գիտեր, թե ամենաթանկն աշխարհում սերն է:

«Այսօր քայլում էի փողոցում, ինձ ժպտում էին, բարևում: Մի մարդ մոտեցավ և ասաց. «Վլադիմիր ջան, մենք Ձեզ շատ ենք սիրում»: Եվ դա փոխադարձ է, Աստված դա տեսնում է: Ես էլ եմ այդպես կարծում: Ձեր ժողովրդի մեջ շատ մեծ սեր կա: Եվ դա երջանկություն է: Ես վստահ եմ, որ սիրո միջոցով դուք ամեն ինչ կհաղթեք: Սիրեք ձեր ծնողներին,երեխաներին, մերձավորներին ու օտարներին»,-խորհուրդ տվեց Վլադիմիր Սպիվակովն' իր ելույթն ավարտելով հայերեն շնորհակալական խոսքերով:

Աշխարհահռչակ դիրիժոր Վլադիմիր Սպիվակովը և նրա ղեկավարած «Մոսկվայի վիրտուոզներ» պետական կամերային նվագախումբը երկու համերգներով ապրիլի 28-ին և 29-ին հանդես եկան Արամ Խաչատրյան համերգասրահում: Հանդիսատեսը մեծ ոգևորությամբ ընդունեց նրանց ելույթները:

Ռուս դիրիժոր, ջութակահար, «Մոսկվայի վիրտուոզներ» նվագախմբի գեղարվեստական ղեկավար Վլադիմիր Սպիվակովը ծնվել է 1944 թվականի Ուֆա քաղաքում: Պատերազմից հետո Սպիվակովի ընտանիքը վերադարձել է Լենինգրադ, որտեղ մայրը դասավանդել է երաժշտական դպրոցում: 1955 թվականին Վլադիմիր Սպիվակովը հաշվառվել է Լենինգրադի կոնսերվատորյային կից դպրոցում,որտեղ աշակերտել է Լ. Մ. Սիգալին և Վ. Ի. Շերային: 1963 թվականին ավարտել է Մոսկվայի կոնսերվատորյային կից կենտրոնական երաժշտական դպրոցը: Սովորել է Մոսկվայի կոնսերվատորյայի Յուրա Յանկելևիչի դասարանում: Որպես դիր իժոր հանդես է գալիս 1965 թվականից: Ամուսնացած է հայ ջութակահար, դիրիժոր Զարեհ Սահակյանցի դստեր' Սաթի Սահակյանցի հետ: