Արվեստի գործառույթներից է մարդկանց սփոփելը. Վլադիմիր Սպիվակով

Աշխարհահռչակ դիրիժոր Վլադիմիր Սպիվակովը շատ է հավանել Կոմիտասի թանգարան-ինստիտուտը: Այս մասին ճանաչված երաժիշտը խոստովանեց մշակութային օջախ այցելությունից հետո: Կոմիտասի թանգարան-ինստիտուտի տնօրեն Նիկոլայ Կոստանդյանի ուղեկցությամբ Սպիվակովը շրջեց թանգարանով, ծանոթացավ ներկայացվող ցուցանմուշներին, օջախի ստեղծման պատմությանը:

«Թանգարանն ինձ շատ դուր եկավ, հիասքանչ ցուցադրություն կա, ես հուշամատյանում գրեցի, որ պետք է պահել մարդկային ոգու նման բարձունքները: Նման բարձունքների օրինակ է Կոմիտասը, նրա կյանքը, գործունեությունը, ծառայությունը: Ամեն գործում ծառայել է պետք. կոչված ենք ոչ թե ղեկավարելու, այլ' ծառայելու»,- «Արմենպրես»-ի փոխանցմամբ՝ նշեց Վլադիմիր Սպիվակովը:

Անդրադառնալով այսօր աշխարհում տիրող բռնություններին ու ատելությանը և այդ համատեքստում մշակույթի գործիչների դերին, ճանաչված դիրիժորը նշեց. «Արվեստը շատ գործառույթներ ունի, որոնք հին օրերից են գալիս: Բայց այսօր գործառույթը մեկն է՝ մարդկանց սփոփելը և զգացմունքների շեշտադրումը ներդաշնակության վրա: Մարդիկ ցրված են աշխարհով, այնքան ատելություն կա, և չպետք է դրան հնարավորություն տալ, որ այն տարածվի, քանի որ դա շատ վատ կվերջանա»:

Աշխարհահռչակ դիրիժոր Վլադիմիր Սպիվակովը և նրա ղեկավարած «Մոսկվայի վիրտուոզներ» պետական կամերային նվագախումբը երկու համերգներով ապրիլի 28-ին և 29-ին հանդես եկան Արամ Խաչատրյան համերգասրահում: Հանդիսատեսը մեծ ոգևորությամբ ընդունեց նրանց ելույթները:

Ռուս դիրիժոր, ջութակահար, «Մոսկվայի վիրտուոզներ» նվագախմբի գեղարվեստական ղեկավար Վլադիմիր Սպիվակովը ծնվել է 1944 թվականի Ուֆա քաղաքում: Պատերազմից հետո Սպիվակովի ընտանիքը վերադարձել է Լենինգրադ, որտեղ մայրը դասավանդել է երաժշտական դպրոցում: 1955 թվականին Վլադիմիր Սպիվակովը հաշվառվել է Լենինգրադի կոնսերվատորյային կից դպրոցում,որտեղ աշակերտել է Լ. Մ. Սիգալին և Վ. Ի. Շերային: 1963 թվականին ավարտել է Մոսկվայի կոնսերվատորյային կից կենտրոնական երաժշտական դպրոցը: Սովորել է Մոսկվայի կոնսերվատորյայի Յուրա Յանկելևիչի դասարանում: Որպես դիրիժոր հանդես է գալիս 1965 թվականից: Ամուսնացած է հայ ջութակահար, դիրիժոր Զարեհ Սահակյանցի դստեր' Սաթի Սահակյանցի հետ: