Լավ կլինի, որ այս անգամ հենց վերջինը լինի

Քոչարյանական նոր «պրոյեկտը»՝ Վարդան Օսկանյանի գլխավորած «Համախմբում» կուսակցությունը, դեռ չենք հասցրել նորմալ «մարսել», և ահա ևս մեկ «ավետիս»՝ մոտ ապագայում ևս մի կուսակցություն կարող է հայտնվել մեր քաղաքական դաշտում: Ասեմ, որ աճի վատ տեմպեր չեն, միայն թե հուսով եմ՝ այդ տեմպերն էլ ավելի չեն ուժեղանա և Հայաստանում կուսակցությունները երբեք մարդկանցից շատ չեն դառնա...

Հիմա վերադառնամ բուն թեմային. հերթական նոր կուսակցությունը, որը կարող է ստեղծվել, նույնպես ԲՀԿ-ի հետ առնչություն ունի, սակայն քոչարյանական «պրոյեկտ» չէ, համենայն դեպս, հուսով եմ: Այս անգամ արդեն նախկին ԲՀԿ-ական, նաև ԱԺ պատգամավոր Վահան Բաբայանն է մտածում նոր կուսակցություն ստեղծելու մասին: Այո, այո, Վահան Բաբայանը՝ նոր կուսակցություն...

Ժողովուրդը մի ասացվածք ունի, ավելի շուտ՝ այսպիսի մի բարեմաղթանք՝ «առաջինը լինի, վերջինը չլինի»: Ես Վահան Բաբայանին նման բան չեմ մաղթում, որովհետև նախ նրա դեպքում սա բնավ առաջինը չէ, նաև կարծում եմ՝ ավելի լավ կլինի, որ այս անգամ հենց վերջինը լինի, որ Բաբայանը վերջնականապես գտնի իր տեղը և այլևս կուսակցություն փոխելու կարիք չունենա, թե չէ «Հանրապետություն», Հայաստանի երիտասարդական կուսակցություն, ՄԻԱԿ, ԲՀԿ...

Ես հասկանում եմ, որ մարդն իրավունք ունի նույնիսկ 80 կուսակցություն փոխել ցանկության դեպքում, բայց վարկանիշային առումով դա հաստատ իրեն էլ ձեռնտու չի լինի, դրա համար էլ անկեղծորեն ցանկանում եմ, որ այս մեկը վերջինը լինի:

Եվ մի հանգամանքի վրա էլ կուզեի ուշադրություն հրավիրել. Բաբայանն ասել է, որ նորաստեղծ կուսակցությունը ընդդիմադիր չի լինի: Սա կոնկրետ ինձ համար միանգամայն ընդունելի ու հասկանալի որոշում է, ուղղակի այս դեպքում մի տեսակ չեմ հասկանում նոր կուսակցություն ստեղծելու իմաստը: Վահան Բաբայանը նոր մարդ չէ քաղաքականության մեջ, Ազգային ժողովի պատգամավոր է՝ շատ թե քիչ ճանաչված, և կարծում եմ՝ շատ հանգիստ կարող էր անդամագրվել իշխանական կոալիցիայի կուսակցություններից որևէ մեկին: Չէին ընդունի՞. չեմ կարծում: Բայց դե, ինչպես ասում են՝ իր գործն է, կարևորը, որ իրականանա իմ բարեմաղթանքը (վերջինը լինելու մասին), այլ ոչ թե ժողովրդականը...

Կարեն Վարդանյան