Արծրուն Հովհաննիսյանը՝ արտոնյալ դասի որդիներին բանակ չզորակոչելու մասին

Բանակը, լինելով այն մարմինը, որն ապահովում է պետության անվտանգությունը, միանշանակ միշտ էլ շահագրգռված է լինելու հնարավորինս համընդհանուր պարտադիր ծառայություն ունենալ. դա ոչ մեկի համար նորություն չէ: Այս մասին քիչ առաջ մամուլի ասուլիսի ընթացքում ասաց ՊՆ խոսնակ Արծրուն Հովհաննիսյանը:

Նրա խոսքով՝ ինքը չգիտի, թե ինչ վնաս կկրի գիտությունը, եթե անխտիր բոլոր երիտասարդներն անցնեն ծառայության, բայց կարծում է, որ միգուցե, կարճաժամկետ փոփոխության փուլ կլինի. «Միգուցե այս պահին ինչ-որ բան կտուժի, բայց ես չեմ կարծում, որ ԶՈւ-ում ծառայելուց հետո գիտության մեջ մտնողների քանակի խնդիր մենք կունենանք: Ես չեմ կարծում, որ ինչ-որ մեկը բանակից հետո խնդիր ունի գիտությամբ զբաղվելու կամ եթե այդ տարիքում չկարողացավ ընդունվի, հետո այլևս չի կարող, մի տեսակ աբսուրդային է հնչում. միգուցե քննարկումների փուլում ինչ-որ հարցեր կլուծվեն, բայց, իմ համեստ կարծիքով, աշխարհում այն պետությունները, որոնք ունեն համընդհանուր զորակոչ և դրանից հետո են միայն գիտությամբ զբաղվում, մեղմ ասած, մեզանից վատ գիտություն չունեն»,- ասաց Արծրուն Հովհաննիսյանը և բերելով շատերին հայտնի Իսրայելի օրինակը, հարց բարձրացրեց. «Իսրայելում բոլորը համընդհանուր ծառայում են, գիտության հետ խնդիր կա՞»:

Ըստ նրա՝ միգուցե անցումային փուլում պետք է ինչ-որ «դեղամիջոցներ» գտնել, բայց կարծում է՝ ինչքան շատ լինի այդ հավասարությունը, այնքան լավ կլինի:

Դիտարկմանը, թե հատկապես չեն ծառայում արտոնյալ դասի ընտանիքիների զավակները, կոռուպցիոն որոշակի հանգամանքներից ելնելով, Հովհաննիսյանն ասաց. «Եթե կան կոռուպցիոն ռիսկեր, որոնց պատճառով չենք հասել 100 տոկոսանոց հաջողության, փորձում ենք կտրել այդ հնարավորությունը, որ լինի 100 տոկոսանոց»: