Արագածոտնում եռատոնի շրջանակում մի խումբ զինծառայողներ պարգևատրվել են ՀՀ պաշտպանության նախարարի պատվոգրով

Հաղթանակի և խաղաղության օրվա կապակցությամբ Արագածոտնի մարզպետարանը կազմապերպել էր հիշատակի արարողություն: Մարզպետ Գաբրիել Գյոզալյանը, մարզպետարանի պաշտոնատար անձինք, Աշտարակ քաղաքի ղեկավարությունը, մարզի կրթական, մշակութային, ուժային կառույցների ղեկավարները, Երկրապահ կամավորական միության անդամները, հոգևոր դասի ներկայացուցիչները այցելել են քաղաքային զբոսայգում գտնվող հուշահամալիր:

Այս մասին տեղեկացնում են Արագածոտնի մարզպետարանի տեղեկատվության և հասարակայնության հետ կապերի բաժնից՝ հավելելով. «արգանքի տուրք է մատուցվել Հայրենական պատերազմի, Արցախյան ազատամարտի և նորօրյա հերոս նահատակների հիշատակին: Ծաղկեպսակներ և ծաղիկներ տեղադրվեցին անմար կրակի շուրջ:

Այնուհետև կայացավ այցելություն դեպի Արցախյան պատերազմում զոհված ազատամարտիկների պանթեոն: Զոհվածների շիրիմները պատվեցին ծաղկեպսակներով և ծաղիկներով: Կատարվեց խնկարկում և մոմավառություն: Հոգևոր դասի կողմից մատուցվեց հոգահանգստի կարգ:

Հաղթանակի և խաղաղության օրվա կապակցությամբ և զինվորական լավագույն ծառայության համար ժամկետային զինծառայողներ Կարապետ Գուլոյանը, Արամ Աբգարյանը, Արտակ Թորոսյանը, Գևորգ Տիգրանյանը և Գարիկ Սահակյանը պարգևատրվեցին ՀՀ պաշտպանության նախարարի պատվոգրով»: